Паспортда гъалатI аваз хьайитIа…
РФ-дин ватандашдин паспортда дуьз, гьакъикъи малуматар къалурун герек я. Дуьз тушир, гъалатIар квай малуматар, делилар авай паспорт гьакъикъи документ яз гьисабзавач ва ам ишлемишна виже къвезвач.
Паспортда къалурнавай гьар са делил сагьибдин муькуь документра къалурнавайбурухъ галаз дуьз атун лазим я. Документ къачудайла, арзачиди ана авай кхьинар, малуматар ахтармишун рикIелай ракъурна виже къведач.
Къачурдалай кьулухъ паспортда са гьихьтин ятIани гъалатI аваз акуртIа, документ дегишарунин гьакъиндай арза вугун чарасуз я.
Чилин участок са шумуд патал паюн
Чилин участок 2 ва я са шумуд чкадиз паюник кадастрдин са жерге кIвалахар акатзава. Алай вахтунда и месэла МФЦ-дин пешекарривайни кьилиз акъудиз жезва.
Чилин участок са шумуд паюниз чара авунин кар вири хсусиятчийри кхьена разивал ганвай меслятдалди кьилиз акъудзава. Хсусиятдин иесидин иштираквал авачиз хьайитIа, адан патахъай векилдиз ихтияр ганвайвилин гьакъиндай нотариусди тестикьарнавай доверенность хьун герек я.
Чилин участок пайдай вахтунда ам ишлемишунин макьсад дегишариз хьун мумкин туш. Чилин участокдиз талукь яз са гьихьтин ятIани сергьятвилер аваз хьайитIа, са шумуд паюниз чара авурдалай кьулухъни абур къуватдай аватзавач.
Эгер чилин участок пуд лагьай ксарин (аренда, залог) ихтиярда аваз хьайитIа, са ва я са шумуд паюниз чара ийидайла, гьа ксарин патайни разивал аваз хьана кIанзава.
МФЦ-дин идарадин куьмекдалди чил паяриз чара авун патал ихьтин документар герек я:
. участокдин сагьибдин паспорт;
. чилин участок регистрация авунвайвилин гьакъиндай шагьадатнама (ва я ЕГРН-дай выписка).
Юзан тийидай объектдиз адрес гун
Агьалийривай МФЦ-дин идарайра «Юзан тийидай объектдиз адрес гун» махсус къуллугъдикай менфят къачуз жеда.
МФЦ-дин вири филиалра агьалийривай са манийвални авачиз и кар кьилиз акъудиз жеда. Ихьтин документар герек я:
. паспорт;
. юзан тийидай объектдин иеси я лагьана тестикьарзавай документ;
. адрес гунин гьакъиндай къарар (постановление).
ИП-дикай
Карчийри ИП-дин (кьилдин карчи) дережа къачуниз гзаф фикир гузва. ИП-дин кьетIенвилер ихьтинбур я:
. ихьтин дуьшуьшда счетдал алай пул государстводи хуьн таъминарзава;
. карчивилин кIвалахдал Россиядин гьар гьи регионда хьайитIани машгъул жедай мумкинвал ава, штатда бухгалтерия кьун чарасуз туш;
. къанундалди куьн тешкилатчи яз тестикь жезвач, и карди налогрин жигьетдай са жерге артухвилер-кьетIенвилер гузва.
Эгер квез жуван хсуси карчивилел машгъул жедай гьевес аватIа, ИП-дин дережа квевай МФЦ-да регистрация ийиз жеда. Арза вугудай вахтунда ватандашдив хсуси паспорт ва ИНН хьун бес жеда.
Госпошлина вахчун
МФЦ-да паспорт, водителвилин, юзан тийидай хсусиятдин сагьибвилин документар ва са жерге маса къуллугъар кьилиз акъудун патал госпошлина гун герек жезва.
Адет яз, госпошлинадин кьадар РФ-дин налогрин кодексди тайинарзава. И ва я маса документдай гузвай госпошлинадин такьатар гьа къуллугъ кьилиз акъудзавай идарадиз физва, гьавиляй а такьатар элкъвена вахчун патални гьа идарайриз арза авун лазим я.
ИкI, эгер квез юзан тийидай объектдин документдиз талукь госпошлина элкъвена вахчуз кIан хьайитIа, ам регистрация ийизвай органдиз арза малумарун герек я. Къанундин бинедаллаз, эгер агьалиди къуллугъдай госпошлина ганватIа, амма адакай менфят къачунвачтIа, ва я тахьайтIа, госпошлина кьадардилай артух ганваз хьайитIа, пул ватандашдив элкъвена ахгакьарзава. Эхиримжи дуьшуьшда, яни кьадардилай артух ганваз хьайитIа, гьа артух гайи пулунин кьадар вахкуда.
Хсусиятдин документ регистрация авунин карда отказ авуртIа, ихьтин дуьшуьшда госпошлина элкъуьрна вахкузвач. Госпошлина элкъвена вахчунин гьакъиндай арза гьакъи гайидалай кьулухъ пуд йикъан къене вугуз жеда.
Гьазурайди — К.Ферзалиев
