Шуьшедин хъипер кьураматдани, цени яшамиш жезвай, тум галачир гьайванрин килфет я. И килфетдин кьетIенвал ам я хьи, хъиперин бедендин са пай и патай а патаз экв акъатзавай жуьрединбур я. «Шуьшедин къиб» тIварни гьавиляй акьалтнава. Гьакъикъатдани, и хъиперин беденар шуьшеда тунвайбур хьиз аквазва. 

Шуьшедин хъипер Кьиблепатан Америкада ва маса чкайра яшамиш жезва. Абурун бедендин яргъивилел вини кьил 3 сантиметр жеда. Винел патан акунрай абур «квакш» тIвар алай хъипериз пара ухшар я.

Шуьшедин хъиперин далу пад къацу тав квайбур я. Хур, руфун саки михьи шуьше хьиз я, анай къене авай органар аквада: рикI, лекь…

И хъипер, адет яз, дагълух тропикрин тамара яшамиш жезва. Фад-фад авахьзавай цин, чарчаррин мукьув яшамиш хьун абуруз иллаки хуш я. Амма и хъипер гьамиша це жезвач. Гзафни-гзаф и хъипер марф къвазвай, кьеж квай гьавада гьерекатдик жеда. Йикъан вахтунда абур пешерин кIаник далдаламиш жезва ва, хурушум алукьдалди, секинвал хуьзва.

Гьазурайди — К.Ферзалиев