И мукьвара Ахцегьа, Аскар Сарыджадин тIварунихъ галай изобразительный искусствойрин школадин залда, Дагъустандин илимринни ахтармишунрин Тахо-Годидин тIварунихъ галай педагогикадин институтдин 80 йисан юбилейдин лишандик кваз, «Педагог-художник» выставка ачухна. Школадин директор Мегьамедзериф Гьажиева кьил кутуналди тешкилнавай мярекатда райондин образованидин хиле кIвалахзавай вири художникризни гьевескарриз чпин яратмишунар жемятдиз раиждай мумкинвал хьана. ИЗО-дин школадин, аялрин яратмишунин кIвалин (ДДТ), Ахцегьрин 1, 2, 3-нумрайрин, Къурукаларин ва Луткунрин хуьрерин школайрин муаллимри изобразительный искусстводин жуьреба-жуьре жанрайрани техникада тамамарнавай 100-дав агакьна кIвалахри тамашачияр гьейранарна.
Итижлу и проект себеб яз районэгьлийризни мугьманриз (республикада туризм артмиш хьунихъ галаз алакъалу яз Ахцегьизни Россиядин регионрай сиягьатчи мугьманар гзаф къвезва) Мегьамедзериф Гьажиев, Энвер Асалиев, Малик Мирзоев, Камиль Шерифалиев, Сабир Азимов, Альбина Баширова, Имам Агьмедов, Рамазан Мамаев, Исамудин Ибрагьимов, Фережуллагь Мирзоев, Ибадуллагь Урдуханов, Сердер Асалиев хьтин, чкадин, чпиз хас лишанрин авторрин яратмишунрихъ галаз таниш жедай мумкинвал ава.
– Чи выставкадин кьилин мурад-метлеб, сифте нубатда, – лугьузва ИЗО-дин школадин директор, Карачаево — Черкесия республикадин лайихлу художник Мегьамедзериф Гьажиева, – райондин умуми ва алава образованидин идарайра кIвалахзавай вири художникар санал кIватIна, абурук юзун, яратмишунрин ашкъи-гьевес кутун, абурун эсеррин хъсан-пис терефар тайинарун я. Ахпа, лап хъсан 5-7 кIвалах хкяна, абур августдин вацра Махачкъалада Дагъустандин НИИ-дин Тахо-Годидин тIварунихъ галай педагогикадин институтдин 80 йисан юбилейдин мярекатрин сергьятраваз тешкилзавай республикадин дережадин выставкадиз тухуда.
Санлай къачурла, Ахцегьа ИЗО-дин школадин бинедаллаз тешкилай выставкадин цIийи проект лап хъсанди хьана ва ам гьар йисан гьа и вахтунда тухудай адетдиз элкъуьрун пландик кутунва. Веревирдеринни гьуьжетрин нетижада гьакъикъат успат жеда лугьурвал, иштиракчийрини тамашачийри экспозицийрин кIвалахар чпелай алакьдайвал веревирдзавай, сада-садаз хъсан-пис, кими-эксик терефар къалурзавай.
Урусрин мисалда «тIямдизни рангуниз юлдаш авач» лугьурвал, чи фикир Мегьамедзериф Гьажиеван «Зулун секинвал» (живопись, холст, масло), Альбина Башировадин «Дурнайрин луж» (живопись, гуашь), Рамазан Мамаеван «Расулан гьейранвал» (барельеф, пластилин), Камил Шерифалиеван «Къадим Ахцегь» (картон, акварель) ва «Санал къуллугъай аскеррин къаматар» (чар, карандаш), Сердер Асалиеван «Шалбуздагъ» (графика, акварель), Фережуллагь Мирзоеван «Ахцегьрин къамат» (живопись, холст, масло), Малик Мирзоеван «Ваза, кьвати, тIурар…» (гъилин-тупIун сеняткарвал, кIарас) ва маса кIвалахрал иллаки желб хьана.
Дашдемир ШЕРИФАЛИЕВ
