Алатай гьафтеда «Лезги газетдин» редакцияда кIелзавайбур цIийи ктабрихъ галаз танишарзавай мярекат кьиле фена. Ана чи алимри, муаллимри, яратмишзавай ксари, милли эдебиятдал рикI алайбуру иштиракна.
Мярекат ачухдайла «Лезги газетдин» кьилин редактор Мегьамед Ибрагьимова лагьана: — Къе чаз куьн, гьуьрметлу юлдашар, милли газетдин сиясатдин отделдин редактор, редакцияда яхцIур йисалай виниз кIвалахзавай журналист, писатель Нариман Ибрагьимован «Тапаррин къармахра» романдихъ ва кьилин редактордин заместитель, муаллим, гьикаятчи Куругъли Ферзалиеван «Баркаллу лезгияр» ктабдихъ галаз танишардай мумкинвал ава. Кьве ктабни «Мавел» издательствода РД-дин сиясатдин ва диндин крарин рекьяй министерстводин къаюмвилик кваз акъатнава. Къейд авун лазим я хьи, кьве ктабдани кIелзавайбур, иллаки акьалтзавай несил патал, важиблу темаяр къарагъарнава. «Тапаррин къармахра» роман чи жаванар ва жегьилар терроризмдин, экстремизмдин идеологиядин хаталувиликай хуьниз бахшнава. Им и темадай милли эдебиятда кхьенвай сад лагьай чIехи эсер я. Куругъли Ферзалиева гзаф йисара чIугунвай зегьмет республикадилай патаз акъатнавай ва гъурбатда еке агалкьунрин, гьуьрметрин иесияр хьанвай чи рухвайрихъни рушарихъ галаз алакъалу я. Ктабда чи саки кьве виш ватанэгьлидин уьмуьрдикай ихтилатзава. За ва редакциядин коллективди кьве автордизни цIийи ктабар рикIин сидкьидай мубаракзава.
Сифте гаф пенсияда авай муаллим Гуьлуьзар Уружевади къачуна.
— Лугьун хьи, «Тапаррин къармахра» роман кIелунив эгечIай зун эсерда кьиле физвай вакъиайри акьван чпел желб авуна хьи, ял ядай фикирни атанач. И гьал акурла, студент тир зи хтулдини ктабдиз итиж авуна. Дидед чIалал кIелиз тежезвай адаз за романда квекай кхьенватIа ахъайна. Ада завай хабар кьуна. «Я баде, ам урус чIалалди акъудиз жедачни? Чун хьтинбуруз адакай еке куьмек жеда хьи». Дугъриданни, ктабдикай акьалтзавай несилдиз гзаф хийир жеда. Терроризмдин ва экстремизмдин идеологиядин таъсирдик акатай чи жегьилар гьихьтин мусибатрик акатнатIа, чаз вилералди акуна. Романди мад ахьтин крар тахьунин вилик пад кьаз куьмекда.
«Баркаллу лезгияр» ктабда зи хуьруьнвиярни ава. Гьар сад чпел дамахдай, чеб къенин жегьилриз чешне къалурдайбур я. Акьван ватанэгьлийрикай делилар кIватIна, вири са ктабда тун тарифлу кар я. Кьве ктабни чи школайрив агакьарнайтIа, хъсан тир.
— Кьве ктабдин темаяр жуьреба-жуьребур ятIани, абуру кьилин са кардиз къуллугъзава – акьалтзавай несилдиз ватанпересвилин, инсанвилин, ахлакьдин, марифатдин, зегьметдин тербия гузва,- вичин фикирар ачухарна ДГПУ-дин профессор, А.Тахо-Годидин тIварцIихъ галай педагогикадин илимдинни ахтармишунрин институтдин педагогикадин сектордин заведующий Шайдабег Мирзоева. — Чаз чизвайвал, уьлкведа ва чи республикадани гьеле терроризмдин, экстремизмдин лепеяр акьалтIнавайди туш. Чи халкьар сад-садал гьалдарунин, уьлкведа граждан дяведик цIай кутунин къастар рикIе авай къецепатан идеологри интернетдикай ва маса такьатрикай менфят къачуз чи жаванрин, жегьилрин кьилер акадарзава, абур гьукумдиз акси гьерекатар авунал гъизва. Гьавиляй чIуру идеологиядин алчах мурадар ачухарзавай Нариман Ибрагьимован эсер кIелзавайбурув агакьун разивалдай кар я.
Машгьур ватанэгьлийрикай кхьин, абур халкьдиз чирун баркаллу кар я. Тарихдин гьакъикъат я, жуьреба-жуьре себебар аваз лезгияр фадлай пата-къерехдиз физва. Маса миллетрин, халкьарин арада абуру анжах лезгидиз хас ерийралди, намусдалди, зегьметдалди, алакьунралди гьуьрмет, авторитет къазанмишзава. Машгьур крарин иесияр тир гзафбурукай чаз малумни туш. Куругъли Ферзалиеваз за цIийи ктаб мубаракзава. И рекье чIугвазвай зегьмет акъвазарна кIандач. Санлай къачурла, кьве ктабни акьалтзавай несилдиз тарсар гудайбур я. Гьавиляй школайра «Важиблувиликай ихтилатзавай тарсара» «Тапаррин къармахра» романдикай, «Баркаллу лезгияр» ктабдикай ихтилат авун, анрай чIукар кIелун лазим я.
Мярекатдал цIийи ктабрикай чпин фикирар республикадин профсоюзрин агъсакъал Салман Асланова, педагогар тир Улушан Муталибова, Сефият Къурбановади, къайдаяр хуьдай органрин къуллугъчи, шаир Фазил Асланова, инженер-эцигунардайди Хидир Агъамова, республикадин туризмдин хилен къуллугъчи Шапери Къурбановади, «Дагъустан» ГТРК-дин журналист Исмаил Къурбанова, Бег Велиева, Гуьлназ Алибеговади ва масабуру лагьана. Роман, урус чIалаз таржума авуна, ва гзаф тираж аваз акъуддай мумкинвал жагъурунин, патара авай машгьур лезгийрикай мадни малуматар кIватIна, «Баркаллу лезгияр» ктабдин кьвед лагьай издание акъудунин теклифарни гана.
Эхирдай Н.Ибрагьимова ва К.Ферзалиева ктабрал яратмишунин кIвалах кьиле фейи гьалдикай ихтилатна, атанвай юлдашриз чпин ктабар багъишна.
Абад Азадов
