И йикъара Каспийскда азаддаказ кьуршахар кьунай кьиле фейи Россиядин чемпионатда чи уьлкведин 50-далай виниз регионрай тир 600-дав агакьна спортсменри заланвилин 20 категориядай гьасиррал чпин устадвал къалурна.
Спортдин важиблу серенжемдиз талукьарнавай пресс-конференциядал Дагъустандин физический культурадин ва спортдин министр С.Сажидова, РД-дин кьуршахар кьунай федерациядин президент Гь.Гьайдарова, республикадин итимрин хкянавай командадин кьилин тренер Гь.Рашидова къейд авурвал, алай йисуз сифте сефер яз итимрин ва дишегьлийрин бягьсер гьа са вахтунда кьиле тухунин къарар кьабулнавай. Иштиракзавай дишегьлийрин кьадарни цIи тIимил тушир. Санлай уьлкведин чемпионатдин пишкешрин фонд 750 миллион манатдикай ибарат тир. Ана гъалибвал къазанмишайбуру алай йисан сентябрдиз Белградда кьиле фидай дуьньядин чемпионатда чпин алакьунар къалурда.
Дугъриданни, са шумуд юкъуз къизгъиндаказ кьиле фейи ва 35 агъзурдалай артух тамашачийри иштиракай акъажунра чна Москвадин патай экъечIзавай чи ватанэгьли Шамил Мамедован (65-кг-дал къведалди заланвал авайбурун арада) гьунарар иллаки вилив хуьзвай. ИкI, 4 бягьсина гъалибвал къазанмишай ам финалда дагъустанви Ибрагьим Ибрагьимовахъ галаз гьасиррал экъечIна. И «гуьруьшдин» эхир пара итижлуди, тамашачийрин рикIериз таъсирдайди хьана. Чи ватанэгьлиди гьейранвалдай саягъда приём кьиле тухвана, инанмишвилелди гъалибвал къазанмишна.
Уьлкведин чемпионатдин тIварцIиз Ш.Мамедов сад лагьай сеферда лайихлу хьанва. Икьван гагьди ада Ярыгинан (кьве сеферда), Поддубныйдин лигадин (алатай йисуз Ш.Мамедоваз Азербайжандай тир Олимпиададин 2 сеферда призёр, дуьньядин — 3 ва Европадин 4 сеферда чемпион Гьажи Алиев 7:2 гьисабдалди кумукьнай), «Яшар Догу-2022» ва маса турнирра гъалибвилер къазанмишна.
Рагнеда Рамалданова
