Алатай гьафтедин эхирра Кьурагь районда жегьилрин ва тиряк ишлемишунихъ, ам маса гунин вилик пад кьунихъ галаз женг тухузвай международный йикъарин сергьятра аваз, «Санал» лишандик кваз жегьилрин форум кьиле фена. Идакай муниципалитетдин администрациядин пресс-къуллугъди хабар гузва.
Форумдин кIвалахда райондин кьил Замир Азизова, РД-дин Халкьдин Собранидин депутат Девлетхан Алиева, РФ-дин МВД-дин Кьурагь районда авай отделенидин начальник Султан Къарибова, райондин кьилин заместитель Альберт Исаева ва масабуру иштиракна.
Мярекатдал сифте гаф рахай муниципалитетдин физкультурадин, спортдин ва жегьилрин крарин рекьяй кардик квай отделдин начальник Рамиз Рамазанован гафарай малум хьайивал, алай вахтунда Кьурагь районда 4400 жегьил ава, «2022-2025-йисара Кьурагь районда жегьилрин сиясат кьилиз акъудун» программа кардик ква. Жегьилрин арада кьилиз акъудзавай проектар, программаяр мадни ава ва абурукай спортдин серенжемриз иллаки кьетIен фикир гузва. Якъин хьайивал, гьар йисуз муниципалитетда 35-дав агакьна спортдин мярекатар тешкилзава ва и жигьетдай район республикада кIвенкIвечи жергейра ава.
Гуьгъуьнлай рахай Д.Алиева къейд авурвал, мектебар акьалтIарайдалай кьулухъ шегьерриз акъатзавай гзаф кьадар жегьилар жуьреба-жуьре пис крарин, тIегъуьнрин, гьа жигьетдай яз ичкидин, пIапIрусдин, тирякдин таъсирдик акатзава. «Ихьтин форумар тухунихъ жегьилар патал еке метлеб ава. Гьукумди жегьилриз кIвалахдай, чпин алакьунар къалурдай шартIар тешкилунилайни абурун пакадин югъ аслу я. Шак алачиз, спортди жегьилар гзаф чIуру краривай хуьзва. Гьавиляй за жегьилриз спортсменрилай чешне къачуниз эвер гузва», — лагьана депутатди.
Гуьгъуьнлай жегьилрин сиясатдиз талукь яз чпин фикирар Султан Къарибова, Альберт Исаева, духтур Жамалдин Рамазанова ва масабуру лагьана. ГьакIни мярекатдин сергьятра аваз волонтеррив райондин администрациядин патай разивилин чарарни къиметлу савкьатар вахкана.
Чи мухбир
