23-июндиз Ахцегь райондиз РФ-дин Госдумадин депутат Артем Бичаевни жемиятдин «Народный фронт «За Россию» гьерекатдин регионда авай Исполкомдин регьбер Жамалудин Шигьабудинов мугьман хьанвай. Идакай муниципалитетдин администрациядин телеграм-каналди хабар гузва.
Сифте нубатда абуру райондин кьил Абдул-Керим Палчаевахъ ва активдихъ галаз гуьруьш кьиле тухвана. Мугьманри районда хъсан патахъ дегишвилер кьиле физвайди къейдна: рекьер цIийикIа туькIуьр хъувун, яшайишдин цIийи объектар эцигун, инфраструктура вилик фин. ГьакIни абуру Украинада кьиле физвай махсус серенжемдин иштиракчийрин хизанриз фикир ва куьмек гунай муниципалитетдин кьилевайбуруз сагърай лагьана.
Гуьгъуьнлай Госдумадин депутатдиз хуьрера авай тIал алай месэлайрикай хабар гана. Мисал яз, Калукрин хуьре аялрин бахча эцигунин игьтияж ава, хуьруьнвийри чпин аялар къунши хуьрерин аялрин бахчайриз тухузва. Калукрин администрациядин кьил Жафер Жалилован гафаралди, алай вахтунда хуьре бахчадиз ракъурун патал 80 аял нубатда акъвазнава.
ГьакIни райондин администрациядин активди Артем Бичаеваз культурадин кIвалер яргъал тевгьена цIийикIа туькIуьр хъувун, реабилитациядин центр патал цIийи дарамат эцигун герек тирдакай хабар гана.
Гуьгъуьнлай Артем Бичаевни Жамалудин Шигьабудинов Абдул-Керим Палчаевахъ ва са жерге жавабдар ксарихъ галаз Фиярин хуьруьз мугьман хьана ва ина авай месэлайрихъ галаз мукьувай таниш хьана. Къенин юкъузни дагъдин и хуьруьз фин патал вацIал муьгъ эцигнавач. И кар себеб яз, мектеб цIийикIа туькIуьр хъувунин кIвалахарни энгел жезва, гьикI лагьайтIа, эцигунра герек къвезвай вири материалар гъилералди ялзава. Чкадин агьалийрив герек чIавуз вахтунда медицинадин куьмек агакьарунин месэлани гьял тавуна ама.
Абдул-Керим Палчаева и месэлаяр гьялунин жигьетдай теклифар гана, амма государстводин патай куьмек авачиз абур гьялиз тежедайди къейдна. Артем Бичаева винидихъ тIвар кьур месэлаяр веревирдна, абурун гьакъиндай серенжемар кьабулдайди къейдна.
Агьмед Магьмудов
