23-июндиз Кьасумхуьрел лезгийрин къагьриманвилин «Шарвили» эпосдин сувар кьиле фена. Гьар йисуз Ахцегьа гурлудаказ, Дагъустандин Гьукуматдин членрин иштираквал аваз чIехидаказ тухузвай и мярекатдин сергьятар цIи гуьтIуь авунвай. И кардихъни себебар авачиз туш. Абурукай кьилинди алай вахтунда уьлкведа авай гьаларихъ галаз алакъалу я.
Ибадуллагь Тагьирован тIварцIихъ галай медениятдин макандин вилик квай майдан яргъалай килигайла жуьреба-жуьре нехишар алай гам хьиз аквазвай. Са патай – самовардин, муькуь патай шишерин гум акъатзавай, гъилин-тупIун сеняткарвилериз талукьарнавай выставкаяр кардик кутунвай, зуьрнечийри акъваз тийиз макьамар язавай, спортдин акъажунар кьиле физвай… Ибур вири суварин «нехишар» тир.
СтIал Сулейманан райондин администрациядин векилрилай гъейри, мярекатда иштиракай гьуьрметлу мугьманрин арада РД-дин Халкьдин Собранидин депутат Девлетхан Алиев, Хив райондин кьил Ярмет Ярметов, Кьурагь райондин кьилин заместитель Альберт Исаев, тарихчи Ризван Ризванов, «Лезги газетдин» кьилин редактор Мегьамед Ибрагьимов, РД-дин писателрин Союздин лезги секциядин председатель Максим Алимов, писатель Сардар Абил, «ЦIийи дуьнья» газетдин кьилин редактор Дашдемир Шерифалиев ва масабур авай. Суварин шадвилерик Докъузпара, Мегьарамдхуьруьн, Кьурагь, Хив, Агъул районрин администрацийрин культурадин управленидин къуллугъчийрини иштиракна.
Вучиз ятIани, тарихдин эпосдиз талукьарнавай мярекатдиз Шарвилидин ватандай – Ахцегь райондин администрациядин патай касни атанвачир. Чи фикирдалди, ахцегьвийрин делегация и суварик кIвенкIвечи жергейра хьун герек тир. ГьикI лагьайтIа, эпосдин кьилин игит Ахцегьай я, ана ачухарнавай вакъиайрин чIехи пай и къадим хуьруьз талукь я. Санлай халкьдиз талукь, умуми суваррик вирида иштиракун, садвал къалурун герек я.
Сифте гаф рахуналди, СтIал Сулейманан райондин кьил Саид Темирханова мугьманар тебрикна, «Шарвили» эпосдин суварин кьетIенвал къейдна, ам арадал гъуник чIехи пай кутунай РД-дин Халкьдин Собранидин депутат Имам Яралиеваз сагърай лагьана.
СтIал Сулейманан районда милли суварин сергьятра аваз муниципалитетдин яшайишдин жуьреба-жуьре хилера агалкьунар аваз кIвалахзавайбурун зегьмет къейд авун хъсан адетдиз элкъвенва. Мергьяматлувилин «Умуд» фондунин директор Савин Велиева Алкьвадрин мектебдин муаллим Гьамид Гьамидоваз (Шарвилидин ролдай), Селимат Гьажиевадиз (Цуькверан ролдай), Курхуьруьн 1-нумрадин мектебдин ученица Амина Шихрагьимовадиз, Кьулан СтIалрин мектебдин ученик Мурад Эмироваз («Шарвили» эпосдиз талукьарнавай конкурсра 1-чкаяр кьунай) пулдин пишкешарни сертификатар гана.
«Шарвилидин экуь руьгь» ктабдай «Лезги газетдин» культурадинни литературадин отделдин редактор Мердали Жалилов «Умуд» фондунин патай Гьуьрметдин грамотадизни 100 агъзур манатдин кьадарда авай пулдин пишкешдиз лайихлу хьана.
СтIал Сулейманан райондин администрациядин патай Саид Темирханова край чирдай музейдин директор, хъенчIин къапарин устIар Набиюллагь Керимхановавни аялрин яратмишунрин кIвалин директор Нариман Османовав – гьуьрметдин грамотаяр, Кьулан СтIалрин мектебдин муаллим Мислимат Османовадив разивилин чар вахкана.
Винидихъ къейд авурвал, суварин сергьятра аваз спортдин са шумуд жуьредай акъажунарни кьиле фена. Гъалибчийриз ва кIвенкIвечи чкаяр кьурбуруз райондин спортдин, туризмдин ва жегьилрин крарин рекьяй кардик квай комитетдин патай грамотаярни пулдин пишкешар гана.
«Шарвили» эпосдин сувар Кьиблепатан Дагъустандин районрай атанвай яратмишдайбурун коллективри гайи концертди, симинин пагьливанри къалурай нумрайри мадни гурлу авуна. РД-дин культурадин лайихлу работник Ярагьмед Ярагьмедова вичиз хас къайдада, устадвилелди кьиле тухвай и мярекатди нубатдин сеферда лезгийрин къагьриманвилин «Шарвили» эпосдин сувар гьакъикъи халкьдинди тирди къалурна.
Агьмед Магьмудов
