Дагъустандай тир набутривай электронный сертификатрин куьмекдалди протезар къачуз жеда. ИкI, июндин вацралай башламишна и сертификатрин куьмекдалди къачуз хьун мумкин тир реабилитациядин техникадин алатрин сиягь гегьенш жеда — абурун кьадар 270-далай виниз я. Идакай Россиядин яшайишдин Фондунин Дагъустандин Отделенидин телеграм-каналди хабар гузва.
Отделенидин Управляющийдин заместитель Осман Эфендиева къейд авурвал, сергьятламиш хьанвай мумкинвилер авай инсанрихъ электронный сертификатрин куьмекдалди гъилерин ва кIвачерин протезар къачудай мумкинвал хьанва.
Виликдай и кар авун патал Отделенидиз финин игьтияж авай, нубатра вилив хвена кIанзавай, я тахьайтIа протез хсуси такьатрихъ маса къачузвай, гуьгъуьнлай государстводивай пул вахчузвай. Гила и месэлаяр маса къайдада гьялиз жезва. Алай вахтунда сертификатдин куьмекдалди неинки протез къачуз, гьакIни, хсуси истемишунар фикирда кьуна, заказдалди гьазурнавайди къачудай мумкинвал ава.
«Лезги газет»
