ЦIийи къайдадал элячIда

Дагъустандин рекъемрин рекьяй вилик финин министр Юрий Гьамзатова къейд авурвал, мукьва девирда республикада цифровизация улакьрин къурулушдивни агакьда. Идакай «Дагъустандин экономика» телеграм-каналди хабар гузва.

ИкI, «Пассажирдин рекъемрин къацу дегьлиз» («Зеленый цифровой коридор пассажира») проектдин сергьят­ра аваз, шегьерда, шегьердиз мукьва мулкара, шегьеррин арада къекъвезвай маршруткайра ихьтин кIвалах кьиле тухуда.

Кьилди къачуртIа, са шумуд цIийи къайда кардик кутада:  пассажирри вири автобусра рекьин гьакъи нагъд тушир жуьреда гун ва автобусрин гьерекат алай вахтунда (в реальном времени) гуьзчивилик кутадай мумкинвал хьун.

Ю.Гьамзатован гафаралди, и проект 2030-йисалди кьилиз акъудун пландик кутунва.

Харжияр эвез хъийида

Дагъустандин энергетикадин ва тарифрин министерстводи улакьрал метандин тадаракар эцигунал машгъул жедай ва и кардиз авунвай харжияр эвез хъувун патал субсидияр чара ийидай фирмаяр тайинарун патал конкурс гатIуннавайдакай хабар гузва.

И макьсадриз республикадин бюджетдай 14 миллион манат пул чара­ ийи­да. Субсидиядин кьадар улакьдин жуьредилай аслу я:

— кьезил улакьдин субсидиядин кьадар — 24, 3 агъзур манатдилай 37, 8 агъзур манатдал кьван;

— кьезил пар чIугвадай улакьдин — 43,2 агъзур манат;

— 8 метр кьван яргъивал алай автобусрин — 56, 7 агъзур манат;

— 8 метрдилай гзаф яргъивал алай автобусрин — 99, 9 агъзур манат;

— пар чIугвадай улакьрин (кроме легкого грузового транспорта и магистрального тягача) — 102, 6 агъзур манат;

— гзаф пар чIугвадай тягачрин -132, 2 агъзур манат.

РикIел хкин, республикада улакь­рал­ метандин тадаракар эцигдай стан­цийриз куьмекар гудайдакай чна виликдай­ хабар ганай. А чIавуз къейд авурвал, Да­гъустанда вири улакьрин вадай са пай метандал ала. Амма улакьар метан­далди таъминардай мумкинвал анжах 17 станциядихъ ава.

Гатун уьруьшриз куьчарнава

РД-дин хуьруьн майишатдин ва не­­дай суьрсетдин министерстводин пресс-къуллугъди хабар гузвайвал, Да­г­ъустандин малдарри майишатра хуьзвай гьайванрин 70 процент гатун уьруьш­риз куьчар хъувунва.

Санлай къачурла, дагълариз куьлуь карч алай 1,4 миллион гьайван куьчарда. Къенин юкъуз лагьайтIа, ­гатун уьруьшрив агакьнавай гьай­ванрин кьадар 1 миллиондилай алат­нава. Абурукай 200 агъзур лапаг улакьра аваз, амайбур яхдиз куьчар хъувуна.

Идалайни гъейри, гатун уьруьшриз ири карч алай 24,2 агъзур гьайванни 450 балкIан куьчарнава.

Къейд ийин хьи, гьайванар куьчарунин кIвалахар тамамдиз акьалтIар­навай районрин арада Ахцегь районни ава.

Гьайванар куьчардайла, маларин духтурри ветеринариядинни санитариядин рекьяй лазим тир серенжемарни кьиле тухузва.

Гьазурайди — Муса  Агьмедов