Играми Алаудин Халидович!
Аллагьди инсанар сад хьтинбур яз халкьнавач: гьар са касдихъ вичин кьетIен кьисмет ава. Куь уьмуьрдиз вил вегьейла аквазвайвал, Халикьди квез захавилелди мурадарни гана, абур кьилиз акъуддай къуватарни. Эхь, йикъан гуьгъуьна йиф къвезвайвал, куь кьисметдизни ракъинин нурар булутри чуьнуьхай легьзеяр мугьман хьана. Амма куьне — Ватандин азадвал, душмандин винел гъалибвал къазанмишун патал чан къурбанд авур кьегьал бубадин кьегьал хци — жув пертвилив акIажариз тунач, вири четинвилериз дурум гана, уьмуьрдин имтигьанрай куьн лайихлувилелди экъечIна.
Куьне баркаллу уьмуьрдин чIехи пай багъри “Лезги газетдиз” бахшна. Куьн садрани чIехи девлетринни машгьурвилин суракьда хьанач, гьар са халкьдин кьилин ярж яз гьисабзавай хайи чIалан къуллугъда акъвазун, ам хуьн ва гележегдин несилрал агакьарун виридалайни важиблу ва кьилин везифа яз гьисабна. Газетда кIвалахзавай йисара куьне чIугунвай зегьметар екебур я. Куь къелемдикай хкатнавай кьван очеркарни зарисовкаяр санал кIватIайтIа, мумкин я са шумуд том арадал атун. Им куь ирс я — хайи чIалал акъатзавай кьилин газетдин тарихда тунвай гьич садрани пузмиш тежер гел.
Къе куьн Дагъустандин милли журналистикадин алемда чIехи гьуьрмет къазанмишнавай кесерлу тIварцIин сагьиб я. Государстводини куь зегьметдал РФ-дин культурадин лайихлу работник, РД-дин культурадин лайихлу работник тIварар гуналди, еке къимет эцигнава. Квелай лезги публицистикада кьетIен хатI, анжах са Гьамидоваз хас хатI арадал гъиз алакьна. Фасагьат чIалалди, мисалралдини чешнейралди, художественный маса алатралди тафаватлу жезвай куь макъалайрин, веревирдерин важиблувал инлай кьулухъни зайиф жедач.
Куь баркаллу юбилейдин сагълугъдай чаз икI лугьуз кIанзава:
Уьмуьрдин рехъ хьурай давам,
Гегьенш ва нурлу.
Са виш йисар хьурай тамам,
Юбилей — гурлу.
Гъам-хажалат чир тахьуй ваз,
Сагъламди хьуй чан!
Зайиф хьана такурай чаз,
Ви руьгь я кIубан!
Алаудин Халидович,
Багьа я чаз вун!
Ви гаф чилел эцигдач гьич,
Ам я чаз къанун.
Ваз 80 йисан юбилей тебрикзавай “Лезги газетдин” редакциядин коллектив
