«ВИЧИН ДЕВИРДИН КЪАГЬРИМАН»
Ихьтин тIвар алаз “Мавел” издательствода Нариман Ибрагьимован нубатдин ктаб чапдай акъатнава. Ам цIи вичин 100 йис тамам жезвай государстводин, общественный деятель Зейдулла Мегьтиеван баркаллу уьмуьрдиз бахшнава.
Девирдин вакъиайрин, уьмуьрдин гьерекатрин, документрин, делилрин, рикIел хкунрин бинедаллаз гьазурнавай гегьенш очеркда ХХ асирда яшамиш хьайи, государстводин, партиядин дестекрикай сад яз, Дагъустанда, иллаки кьиблепатан районра Советрин гьукум тешкилиз, халкьдин майишат гуьнгуьна тваз, культура, образование, медицина вилик тухуз, вичелай алакьдай кьван хъсан кIвалахар авур, хейлин йисара районриз, зегьметчи коллективриз регьбервал гайи, республикада ва СССР-да кьиле фейи гзаф вакъиайрин шагьид хьайи Мегьтиев Зейдулла Бабаевичакай суьгьбетзава.
Инсанди датIана виликди гьерекатзава, зурба крар тамамарзава, тарихда, халкьдин рикIе жанлу, экуь гел тазва, асиррилай асирралди, несилрилай несилралди вичин алакьунар, бажарагъ, зегьметдин бегьерар рикIел хкуниз мажбурзава. Гьа ихьтин инсанриз къагьриманарни лугьузва. Менфятлу крарик чпин зегьметдин пай кутазвай ксари и чилел ва чпихъ галаз яшамиш хьайи инсанрин рикIера квахь тийидай, дамахдай гел тазва. Алатай асирдин вакъиайрин шагьид, зурба крарин иштиракчи, чIехи къуллугърин, гьукуматдин наградайрин сагьиб хьайи ктабдин игитди хьиз.
Ктабда Филерин хуьруькай, жемятдин кьисмет алакъалу хьайи Докъузпара ва Мегьарамдхуьруьн районрикайни куьрелди ихтилатзава. Алай йисан 10-июлдиз Махачкъалада “Коммунист” газетдин коллективдизни цIуд йисалай виниз регьбервал гайи Зейдулла Мегьтиеван юбилейдин мярекат кьиле фида. Адакай гегьенш очерк “Лезги газетдини” къведай нумрада гуда.
Хийир Эмиров
