Пуд лагьай чкадал

«Дагъустандин экономика» теле­грам­-каналди кхьизвайвал, официальный статистикадин делилралди, кIвалахдик квачир агьалийрин кьадардал гьалтайла, Дагъустан СКФО-да пуд лагьай чкадал ала.

Санлай къачурла, СКФО-да и категориядик акатзавай агьалийрин кьадар 114 агъзур касдиз барабар я, кьилди Дагъустанда лагьайтIа, кIвалахдалди таъмин тушир 15,7 агъзур кас ава.

Чешмеди къейдзавайвал, Ке­­фер­па­тан Кавказда, алатай йисан 1-кварталдив гекъигайла, кIвалахдик ква­чир агьалийрин кьадар 20% тIимил хьанва.

КIвалахдик квачир агьалияр вири­да­лайни гзаф Чечняда ава – саки 52 агъзур кас, виридалайни тIимил — Ка­рачаево-Черкесияда – 2,2 агъзур кас.

Мад кьве фабрика

Дагъустандин промышленностдин ва алишверишдин министр Низам Халилова къейд авурвал, респуб­ликада сар гьялдай мад кьве фабрика кардик акатда. Анра саки 150 кас кIвалахдай чкайралди таъминарда.

Министрдин гафаралди, Дагъустан сар гьасилунал гьалтайла кIвенкIвечи жергейра аватIани, республикада сар гьялдай алай девирдин карханаяр авач.

Вичикай ихтилат физвай проект кьилиз акъудуни региондин и хиле зегьмет чIугвазвай карчийрин са бязи харжияр тIимиларда. Мисал яз, сар гьялдай центрайрив агакьарунин карда акъатзавай пулар кьенят жеда. И делилди гьакIни гъалар, парчаяр, трикотаждин затIар акъудунин кардизни рекьер ачухда.

Дагъустанвийрин мажибрикай

«FinExpertiza» сетдин аналитикрин делилралди, дагъустанвийрин вадакай са паюни къачузвай мажибдин кьадар 45 агъзур манат ва адалай артух я.

СКФО-дин регионрин арада ихьтин мажиб къачузвайбур гзаф авай субъект Дагъустан я. Им мажибар къачузвай­ агьалийрин умуми гьисабдикай 22,2 процент я.

Мисал яз, Кабардино-Балкарияда агьалийрин 18,8 процентдин мажибрин кьадар 45 агъзур манатдилай башламиш жезва. Чечняда — 18, Ставрополдин крайда 15 процентди и кьадарда аваз мажибар къачузва.

Ингушетияда ихьтин къазанжи къачузвай агьалийрин кьадар 4, 4 процентдив агакьзава, Карачаево-Черкесияда лагьайтIа, абурун кьадарди 6,7 процент тешкилзава.

Сагъламвал мягькемарун патал

Алай йисан 1-июндилай Россиядин аял­рин духтурханада (РДКБ) – РФ-дин здравоохраненидин министерст­водин «Российский национальный ис­следовательский медицинский уни­верситет имени Н.И. Пирогова»  ФГАОУ ВО-дин филиалда — аялрин федеральный дережадин реабилитациядин центр кардик акатнава.

И центрадин пешекарар Дагъустандай тир азарлубурни кьабулиз гьазур я. Идакай республикадин здравоохраненидин министерстводин телеграм-каналди хабар гузва.

Диде-бубайривай РДКБ-дин сайтдин куьмекдалди арза ракъуриз жеда. Къейд ийин хьи, духтурханадин сайтда и месэладиз талукь алава малуматарни ганва.

Кьадардилай артух

Дагъустандин хуьруьн майишатдин ва недай суьрсетдин министр Мухтарбий Аджекова къейд авурвал, рес­публика хипен якIалдини прунздалди чкадин агьалийрин игьтияжрин кьадардилай 3-3,5 сеферда артух яз таъмин я.

РикIел хкин, 2022-йисуз Дагъустандин аграрийри 1,3 миллион тонн салан майваяр, саки 210 агъзур тонн емишар, 332 агъзур тонндилай гзаф картуфар, 129 агъзур тонндилай виниз прунз ва 37,5 агъзур тонндилай артух хипен як арадал гъанай.

Гьазурайди – Муса  Агьмедов