Алатай гьафтедин эхирра Махачкъалада Дагъустандин Госсоветдин гьуьрметлу председатель, РФ-дин Зегьметдин Игит Мегьамедали Мегьамедован экуь къаматдиз бахшнавай мемориалдин кьул ачухна.
Мярекатда РД-дин Кьил Сергей Меликова, РФ-дин Президентдин Администрациядин Руководителдин заместитель Мегьамедсалам Мегьамедова, республикадин жемиятдинни сиясатдин векилри ва масабуру иштиракна.
Къейд ийин хьи, мемориалдин кьул РД-дин Гьукуматдин КIвалин дараматдал алкIурнава. Ина М.Мегьамедова саки 25 йисуз кIвалахна, абурукай 15 йисуз лагьайтIа, республикадин кьиле акъвазна. Эгер Мегьамедали Мегьамедов чи арада амайтIа, 15-июндиз адан 93 йис тамам жедай.
* * *
Дагъустандин регион идара ийидай центрада (ЦУР) цIийи регьбер тайинарнава. Ведомстводин кьиле виликдай РД-дин Кьилин информациядин сиясатдин Управленидин ва пресс-къуллугъдин отделдин начальник яз кIвалахай Ислам Мусаев акъвазнава.
РикIел хкин, виликдай и къуллугъдал Султан Абдуралимов алай. ЦУР-дин кIвалахдин асул везифа соцсетрин куьмекдалди республикадин агьалийри жуьреба-жуьре ведомствойриз, государстводин идарайриз рекье твазвай арзайриз къимет гун ва абура къарагъарнавай месэлаяр гьялзавай къайдадал гуьзчивал тухун я.
* * *
13-июндиз илимдин, техникадин, эдебиятдин, публицистикадин, искусстводин, архитектурадин хилерай государстводин премияр гунин рекьяй РД-дин Кьилин патав кардик квай комиссиядин заседание кьиле фена. Адан сергьятра аваз, комиссиядин членри, чинебадаказ сесер гунин нетижада, премияр чара ийидай кIвалахар хкяна.
РикIел хкин, эдебиятдин хиляй премия къачун патал теклифнавай ктабрин арада Мансур Куьревидин (Низами Абдулгьамидован) “Етим Эмин (1840-1880)” ктабни авай. Анжах ам премийрин сагьибрин жергейра гьатнач. Эдебиятдин хиляй теклифнавай 9 кIвалахдикай премияр гун патал кьвед хкяна: Миясат Муслимовадин «Диалог с Данте» ва Шиитханум Алишевадин «Исповедь страждущей души» (къумукь чIалал) ктабар.
Чи мухбир
