9-июндиз РД-дин Кьил Сергей Меликова яшайишдин жуьреба-жуьре хилера тафаватлу хьайи са жерге дагъустанвийрив государстводин шабагьар вахкана. Абуруз лайихлу хьайибурун арада чи ватанэгьлиярни ава.

РД-дин Кьилин Указдалди, республика­дин Гьукуматдин Председателдин замес­титель Нариман Абдулмуталибоваз Да­гъус­тан яшайишдинни экономикадин рекьяй вилик финик кьетIен пай кутунай медаль гана. Идалай гъейри, Лезги театр­дин кьилин режиссер Казбек Думаеваз – «РД-дин лайихлу артист», республикадин халкьдин яратмишунрин кIвалин къуллугъчи Алихан Мегьамедрагьимоваз «РД-дин искусствойрин лайихлу деятель» тIварар ганва.

Мадни, Сергей Меликован Указдалди, СтIал Сулейманан райондин Курхуьруьн 2-нумрадин юкьван мектебдин директор Эмирулагь Абдулазизоваз «РД-дин образованидин лайихлу къуллугъчи» тIварни ганва.

Агьмед Магьмудов