И йикъара Дагъустандин халкьдин писатель, филологиядин илимрин доктор, профессор, лезги халкьдиз цIудалай виниз устадвилелди кхьенвай романар, са шумуд энциклопедия, маса ктабар, мектебар патал учебникар ва методикадин  пособияр багъишнавай автор, сиясатдинни жемиятдин хилера вичин гаф лугьуз  алакьнавай деятель Къурбан Халикьович Акимован 85 йис тамам жезва.

Милли чIалал, эдебиятдал, медениятдал, та­рихдал рикI алай вирибур патал им чIехи вакъиа­, тебрикдай кар я. Чи чIехи хва, арха, амадаг, гзаф крарин кIвенкIве авай меценат, къелемни рикI хци яз, девирдин муракаб месэлайриз жавабар жагъуриз, халкьдиз руьгьдин жигьетдай мадни­ къуватлу жедай рекьер къалуриз, кардин яцIа ава. Къуй вичихъ чандин сагъвал, яратмишунрин цIийи агалкьунар хьурай.

*  *  *

…Гьаким Къурбан милли литературадин алемда анжах гьикаятдин эсерар­ кхьизвайбурукай сад я. Адан басмадай акъатнавай гьикаяйрин, новеллайрин, очерк­­рин ва повестрин кьадарар 20-далай алатнава, романрин кьадар 13-дав агакьнава. Абурукай сад лагьай эсеррик «Диде ва руш» гьикая («Коммунист» газет, 1958-йисан 1-январь), «Деребег» новелла («Коммунист», 1959-йисан 25-январь), «Самурдин либасар» (Дагъустандин ктабрин издательство, кьилди ктаб, 1961-йис),  «Марфадин стIалар» повесть («Дуствал» альманах, I966-йисан 4-нумра, 32-57-ч.) ва «Ракъинин муг» роман (ДКИ, 1984-йис) акатзава. Абур, санлай къачурла, лезги чилин тIебиатдикай, яшайишдикай, жегьилрин муьгьуьббатдикай кхьенвай ивирар я.

«Лезги газет»