«Заз гзаф хуш я къе лайихлу тир и пишкешар агакьариз. Энергетикрин кIвалахдин важиблувилиз кьадардилай гзаф къимет гун мумкин кар туш, гьикI лагьайтIа, анжах куь зегьметдалди инсанар патал виридалайни лазим къулайвилер — чимивал ва экв — арадал гъизва. Куь зегьметдилай карханайрин, государстводин идарайрин, школайрин, азарханайрин, гьар са агьалидин кIвалин къулайвал асул я».
Ихьтин келимайралди Дербент райондин кьил Мавсум Рагьимова, электросетрин къуллугъчийрив государстводин пишкешар вахкудайла, абурун гьакъисагъ зегьметдин важиблувал къейдна. Алай йисан 4-апрелдиз Мавсум Рагьимова пишкешар вахкайбурун арада «Россети Северный Кавказ»-«Дагэнерго» ПАО-дин филиал тир Дербент райондин электросетрин кьилин инженер Муьгьуьдинов Муьгьуьдин Жамалдиновични авай. РД-дин Кьил Сергей Меликован 2023-йисан 21-февралдиз кьабулай къарардалди, Муьгьуьдин Муьгьуьдиноваз «Дагъустан Республикадин лайихлу энергетик» лагьай тIвар ганва.
М.Муьгьуьдинов Мегьарамдхуьруьн райондин Гилийрин хуьре 1957-йисуз дидедиз хьана. Школа акьалтIарайдалай кьулухъ ам Дагъустандин политехнический институтдик экечIна. «Инженер-электрик» лагьай пешекарвал къачунвай жегьилди зегьметдин рехъ 1982-йисалай чехирчивилин «Рассвет» совхозда кIвалахунилай эгечIна.
Республикадин энергокъурулушда ада 1985-йисалай кIвалахиз башламишна. Сифтедай адакай Дербентдин электросетрин ВВС-дин къуллугъдин мастер, ахпа старший инженер, гуьгъуьнлай ПТС-дин начальник, Дербентдин электросетрин Энергосбытдин начальник, «Распределительный сетрин къуллугъдин» начальник, кьилин инженердин заместитель хьана. 2006-йисан ноябрдилай, «Дагэнерго» ОАО цIийикIа туькIуьр хъувурдалай кьулухъ, Муьгьуьдин Муьгьуьдинов «МРСК СК» ОАО-дин филиал тир Дербентдин райондин электросетрин кьилин инженердин къуллугъдал тайинарна.
Зегьметдин рекьин гьар са камуна ада вич анжах хъсан патахъай къалурна. Ам вичин кIвалахдал рикI хьуналди, жавабдарвал дериндай гьисс авуналди тафаватлу я. Виниз тир дережадин пешекар тир Муьгьуьдин Муьгьуьдинов производстводин вири дережайрин гъавурда авай кас я. Пландик кутунвай кIвалахар ада вахтунда ва ерилудаказ кьилиз акъудзава.
— Дербентдин РЭС-дин хиве авай месэлаяр гьялдайла М.Муьгьуьдинова вич электроэнергетикадин хиле гьам дерин чирвилер, гьамни хъсан тежриба авай вини дережадин пешекар яз къалурзава, — къейдзава Дербентдин РЭС-дин начальник Ариф Селимова М.Муьгьуьдинован кIвалахдикай суьгьбетдайла. — Ада датIана электросетрин тадаракар авай гьал хъсанарунин, электроэнергия агакьарунин кIвалах кьиле тухузва. ГьакIни ам производстводин хъсан тешкилатчи я.
А.Селимова къейдзавайвал, М.Муьгьуьдинован кIвалахдин нетижа яз, эхиримжи йисара райондин муьштерияр электроэнергиядалди таъминарунин дурумлувал хъсан патахъ дегиш хьанва. Электросетрин тадаракар гуьнгуьна хутунин, цIийикIа туькIуьрунин ва бинедилай ремонт авунин кIвалахар, Муьгьуьдин Жамалдиновичан гуьзчивилик кваз, гьар йисуз кьиле тухузва. КьетIен фикир ада карханадин къуллугъчияр гьазурунин, абурун кIвалахдин ва ял ягъунин шартIар хъсанарунин кардиз гузва.
Кьилин инженерди эхиримжи йисара электроэнергия муьштерийрал агакьарунин рекье жезвай квахьунар, гьакIни сетдин напряжение къайдада хьун хьтин месэлайризни еке фикир гуз башламишнава.
«Муьгьуьдин Муьгьуьдиноваз инсанрихъ галаз алакъаяр дуьздаказ туькIуьриз чида. Ам хизандани хъсан уьмуьрдин юлдаш ва буба я», — давамарзава Ариф Селимова.
ИкI, коллективдин общественный уьмуьрдани ада активнидаказ иштиракзава. Вичин асул везифайрихъ галаз санал ада гьар жуьре йисара ДЭС-дин профкомдин председателдин заместителдин, яшайишдин кIвалерин комиссиядин председателдин, партиядин сифтегьан организациядин секретардин везифаярни тамамарна.
М.Муьгьуьдинован зегьмет «Дагэнерго» ОАО-дин, «РАО Россиядин ЕЭС» РАО-дин Векилхана тир «Южэнергодин», гьакIни «Дагэнергосеть» ОАО-дин гьуьрметдин грамотайралди къейднава, ам «Российские сети» ПАО-дин электросетрин комплексдин ветеран лагьай тIварцIин сагьиб я.
Жасмина Саидова
