4-июндиз Москвада Россиядин Президент В.Путинан Кубок патал самбодай международный XV турнир акьалтIна. Чи уьлкведин Яракьлу Къуватрин, МВД-дин, ФСИН-дин, инженервилин кьушунрин, МЧС-дин, ВДВ-дин, Милли гвардиядин, «Динамо-24» командайрик кваз, гьакI Эрменистандай, Белоруссиядай атанвай самбистрини гьасиррал чпин устадвал къалурна. Кубокдин иштиракчийрин ва мугьманрин тIварунихъ В.Путина тебрикдин гафар кхьенвай чар рекье тунвай.
Турнирда Россиядин ФСИН-дин (Федеральная служба исполнения наказаний) команда 1-чкадиз лайихлу хьана. Шадвилелди мадни а кардикай хабар гуз кIанзава хьи, и гъалибвал къазанмишуник чи ватанэгьли, вичин ери-бине СтIал Сулейманан райондин Алидхуьрелай тир машгьур спортсмен Аслан Къурбанова 88 кг-дин заланвал авайбурун арада 4 бягьс кьиле тухвана, къизилдин медаль къазанмишуналди, лайихлу пайни кутуна. Аферин!
РикIел хкин: А.Къурбанов универсальный бягьсерай дуьньядин ва Европадин са шумуд сеферда чемпион я. ЦIи мартдиз ада спортдин самбодай Россиядин чемпионвилин тIвар къазанмишна, ам республикадин тарихда спортдин и кукIуш муьтIуьгъарнавай сад лагьай кас я.
Рагнеда Рамалданова
