Алатай гьафтедин ял ядай йикъара Каспийскда, Али Алиеван тIварунихъ галай спортдин дараматда, грэпплингдай Дагъустандин кIвенкIвечивал патал жаванрин арада акъажунар кьиле фена. Ана республикадин районрайни шегьеррай тир 800-дав агакьна аялри чпин устадвал къалурна.
Саки пуд юкъуз ва итижлудаказ кьиле фейи бягьсерин нетижада Gi ва No Gi (кимоно алаз ва кимоно алачиз) жуьрейрай заланвилин 5 категориядай гъалибчияр майдандиз акъатна. Гила абурукай СКФО-дин акъажунра иштиракдай команда арадал гъида.
Шадвилелди хабар гуз кIанзава хьи, и акъажунра гъалиб хьайи ва приздин чкаяр кьурбурун арада ЦIийи Усуррин, Гъепцегьрин ва КьепIир-Къазмайрин хуьрера тренер-муаллим, джиу-джитсудай дуьньядин са шумудра чемпион ва гзаф маса шабагьрин сагьиб Эйнар Экберован гъилик вердишвилер къачузвай са шумуд жаванди хъсан нетижаяр къазанмишна. Кьилди къачуртIа, 2008-2009-йисара дидедиз хьайи жаванрин арада No Gi разделдай Мегьамед Шагьбанов (66 кг) — 1, Къазиагьмед Гьажиев (73 кг) — 2 ва Исламудин Къадимов (53 кг) — 3 ва Gi разделдайни Ренат Гьажибегов (59 кг) — 3, Къазиагьмед Гьажиев (73 кг) 3-чкайриз лайихлу хьана.
Чна чи гьар са ватанэгьлидал тебрикдин чими келимаяр агакьарун яз, абурухъ мягькем сагъвал ва мадни еке агалкьунар хьун алхишзава.
Рагнеда Рамалданова
