И мукьвара Санкт-Петербургда джиу-джитсудай кьиле фейи уьлкведин чемпионатда чи халкьдин мад са векилди — Камран Заманович Мамедьярова — вили рангунин чIулар авай спортсменрин арада (80 кг-дал къведалди заланвиляй) No Gi разделдай Россиядин чемпионвилин тIвар къазанмишна.
Чаз чир хьайивал, К.Мамедьярован ери-бине Азербайжандин Огъуз районда авай лезгийрин Къарабулагъ хуьряй я. Ам Норильск шегьерда дидедиз хьана. Алай вахтунда чи ватанэгьли Красноярскда яшамиш жезва. ММА-дай ва грэпплингдай Красноярскдин крайдин чемпион, спортдин и жуьрейрай Сибирдин федеральный округдин призер, гьакIни спортдин мастервиле кандидат тир Камран Мамедьяровахъ «Скорпион» тIвар алаз вичин хсуси клуб ава. Ада аялриз ва чIехибуруз ММА-дай вердишвилер гузва. Исятда адан гъилик кьве дестедик кваз 30-дав агакьна аялри, гьакьван чIехибуруни чпин устадвал хкажзава.
Къейд авун лазим я хьи, К.Мамедьяровахъ вичихъ хьиз, адан гъилик вердишвилер къачузвай, устадвал хкажзавай спортсменрихъни хъсан нетижаяр ава. ИкI, абурукай са шумуд панкратиондай, грэпплингдай, ММА-дай Сибирдин округдин, Россиядин чемпионвилин тIварариз лайихлу хьанва.
Рагнеда Рамалданова
