Алкьвадар Гьасанан тIварцIихъ галай медениятдинни марифатдин центради
республикадин вузра лезги чIал чирзавай студентриз махсус стипендия гуда
Эхиримжи йисара ДГУ-дин филологиядин факультетдин урус ва Дагъустандин чIаларин отделенидик, ДГПУ-дин Дагъустандин филологиядин факультетдик экечIзавайбурун кьадар садлагьана тIимил хьанва. И факультетра чи республикадин мектебар патал хайи чIаларин тарсар гузвай муаллимар гьазурзава. Мектебар акьалтIарзавайбурун арада чпин уьмуьр хайи чIалан муаллимвилин пешедихъ галаз алакъалу ийиз кIанзавайбурун кьадар тIимил хьуни вилив хуьн тавур хьтин нетижаяр арадал гъун мумкин я.
Винидихъ тIвар кьур факультетар хкязавайбур гзаф хьун патал акьалтзавай несилдин арада хайи чIаларин кесерлувал артухарунин макьсаддалди кIвалах кьиле тухунихъ, хайи чIаларин тарсар гузвай муаллимрин мажибар артухарунихъ ва са жерге маса серенжемар кьабулунихъ еке метлеб ава.
КIелунин цIийи йисалай Алкьвадар Гьасанан тIварцIихъ галай медениятдинни марифатдин центради ДГУ-дин филологиядин ва ДГПУ-дин Дагъустандин филологиядин факультетрин лезги чIал чирзавай 1-курсунин студентриз 3 агъзур манатдин кьадарда аваз махсус стипендия гудай къарар кьабулнава. Къейд ийин хьи, стипендия вацра са сеферда гуда. Идалай гъейри, центрадихъ и факультетра лезги чIал чирзавай вири студентриз маса рекьерайни куьмекар гудай ниятар ава.
РикIел хкин, Алкьвадар Гьасанан тIварцIихъ галай центр алатай йисуз арадал гъана. Адан кIвалахдин асул макьсад лезги чIал, милли меденият, тарихдин ирс хуьн ва вилик тухун, тарихдинни медениятдин гуьмбетар винел акъудун ва абурун гьакъиндай ахтармишунар кьиле тухун я. Центрадин директордин везифаяр «Лезги газетдин» кьилин редактор Мегьамед Ибрагьимова тамамарзава.
Агьмед Магьмудов
