СтIал Сулейманан райондин Сардархуьре кардик квай спорткомплекс­да, Ватандин ЧIехи дяведин иштиракчи А.Алимов рикIера хуьнин лишан яз, жаванрин арада дзюдодай республикадин турнир кьиле фена. Ам, тебрикдин келимаяр лугьуналди, райондин кьил Саид Темирханова ачухна. Анал РД-дин дзюдодин федерациядин вице-президент Ю.Исмаилов, спортдин, туризмдин ва жегьилрин крарин рекьяй комитетдин директор Ч.Абдулмежидов, СССР-дин спортдин мастер М.Салигьов, вирироссиядин дережадин судья З.Мегьамедов, спорт­школайрин директорарни тренерар рахана.

Спортдин мярекат карчи Сагьиб Алимова спонсорвилин куьмек гуналди райадминистрацияди, образованидин управлениди, спортдин комитетди тереф хуьналди, районда кардик квай самбодинни дзюдодин ДЮСШ-ди тешкилнавай.

Турнирда Махачкъала, Къизилюрт, Буйнакск, Дербент шегьеррай, Дербент, Новолак, Хив, СтIал Сулейманан, Агъул, Шамил, Тлярата ва маса районрай атанвай 120-далай виниз жаванри чпин устадвал къалурна.

ИкI, къизгъиндаказ кьиле фейи акъажунрин нетижада СтIал Сулейманан райондин команда 1-чкадиз лайихлу хьана. Къизилюртдин — 2 ва Махачкъала шегьеррин командайри 3-чкаяр кьуна.

Гъалибчийриз, призерриз ва абурун тренерриз кубокар, медалар, грамотаяр ва пулдин призар гана.

Хазран Кьасумов