24-майдиз чи арадай РД-дин лайихлу артист, Лезги театрдин актер, машгьур манидар Руслан Бульфарович Пирвердиев акъатна. Адан 49 йис тир. Артистдин кьиникь гзафбуру лезги меденият патал еке магьрумвал хьиз кьабулна.
Р.Б.Пирвердиев 1974-йисан 20-июндиз Хачмаз райондин Яламада дидедиз хьана. ГъвечIи чIавалай халкьдин манийрал рикI алаз чIехи жезвай гадади асул кIелунрихъ галаз санал музыкадин мектебдани чирвилер къачуна. Жуьреба-жуьре конкурсра, проектра иштиракзавай. Юкьван мектеб Бакуда акьалтIарна. Гуьгъуьнлай Азербайжандин архитектурадин ва эцигунрин госуниверситетдик экечIна. Вуздилай кьулухъ Азербайжандин консерваториядин школада-студияда вокалдин отделенидик экечIна. 1996-йисалай адакай Бакуда лезгийрин машгьур шаир Седакъет Керимовади арадал гъанвай «Сувар» ансамблдин манидар хьана.
2006-йисуз Р.Б.Привердиев Дагъустандиз куьч хьана. 2008-йисуз Дагъустандин операдин ва балетдин театрда кIвалахал акъвазна. 2009-йисалай Лезгийрин СтIал Сулейманан тIварцIихъ галай госмуздрамтеатрдин актер тир.
Милли театрда зегьмет чIугваз эгечIай йикъалай Р.Б.Пирвердиева вич алакьунар авай, цIийивилерихъ къекъвезвай актер яз къалурна. Ада датIана вичин пешекарвал хкажун патал кIвалахзавай. Сифте яз хайи театрдин сегьнедал жегьил актер У.Гьажибегован «Аршин мал алан» опереттада Аскеран ролда къугъвана. Гуьгъуьнлай ада чубан Къадиман (Х.Тагьиранни Къ.Межидован «Ашукь Саид»), алверчи Сулейманан (А.Абдулгъафурован «Зирек Алмас»), Билалан (А.Исмаилован «Пуд югъ»), Гьажидин (С.Рамазанован «КьепIир Айисат») ва масабурун къаматрал чан гъана.
Театрдин искусство вилик тухунин кардик еке пай кутунай ва милли театрда кIвалахиз 20 йис тамам хьунихъ галаз алакъалу яз, Р.Б.Пирвердиеваз «РД-дин лайихлу артист» тIвар гана. Адан яратмишунрин рехъ милли театрдин тарихда чешне къачуниз лайихлуди, кьетIенди яз амукьда.
«Лезги газетдин» редакциядин ва Лезги театрдин коллективри Руслан Бульфарович Пирвердиев рагьметдиз финихъ галаз алакъалу яз, адан хизанриз, вири мукьва-кьилийриз, дериндай хажалат чIугунивди, башсагълугъвал гузва.
