26-майдиз Кьасумхуьрел, И.Тагьирован тIварцIихъ галай медениятдин маканда, Дагъустандин халкьдин шаир Сажидин Саидгьасанован 90 йис тамам хьуниз талукьарнавай шадвилин мярекат кьиле фена. Ана СтIал Сулейманан райондин кьил Саид Темирханова, адан заместителри, муниципалитетдин администрациядин жавабдар къуллугъчийри, мергьяматлувилин «Умуд» фондунин регьбер Савин Велиева, «Лезги газетдин» кьилин редактор Мегьамед Ибрагьимова, жуьреба-жуьре районрайни шегьеррай атанвай мугьманри, шаирри, гьикаятчийри ва масабуру иштиракна.
Юбилейдин межлис Саид Темирханован рахунрилай гатIунна. Шаирди Дагъустандин эдебият вилик тухуник кутунвай пай къейд авуналди, ада гафунин устаддин яратмишунрин алемдиз еке къимет гана, адахъ чандин сагъвал, яргъи уьмуьр хьун алхишна, Сажидин Саидгьасанова неинки са шииратдин, гьакIни медениятдин, яшайишдин маса хилерани бегьерлудаказ зегьмет чIугурди, и кар алай вахтундани давамарзавайди къейдна. «Ам РФ-дин ва РД-дин писателрин, РФ-дин журналистрин Союздин член, СтIал Сулейманан тIварцIихъ галай фондунин регьбер, «Куьредин ярар» центр арадал гъайибурукай сад я. Хейлин йисара шаирди чкадин телевиденида кIвалахна, акьалтзавай несилриз чирвилер гана. Педагогвилин рекье алакьунрай ам «ДАССР-дин образованидин отличник» тIварцIиз лайихлу хьана. Гуьгъуьнлай С.Саидгьасановаз «РД-дин лайихлу насигьатчи» тIварни гана», — алава хъувуна С.Темирханова ва юбилярдив администрациядин патай пулдин пишкеш вахкана.
Шаирдин уьмуьрдин ва яратмишунрин рекьикай гегьенш доклад гьикаятчи, муаллим Нажмудин Шихнабиева авуна. Ада Сажидин Саидгьасанов лезги кIелзавайдаз неинки шаир, гьакI драматург, гьикаятчи, публицист, таржумачи хьизни чизвайди къейдна, адан къелемдикай хкатнавай ктабрин тIварар кьуна, абурун кьетIенвилерикай рахана.
Гуьгъуьнлай, Сажидин Саидгьасановаз юбилей мубаракиз, сегьнедиз сад-садан гуьгъуьналлаз мярекатдин иштиракчияр экъечI-на. РД-дин писателрин Союздин лезги писателрин секциядин регьбер Максим Алимова шаирдив РФ-дин писателрин Союздин ва «Мавел» чапханадин патай гьуьрметдин грамотаяр вахкана. РД-дин Халкьдин Собранидин депутат Имам Яралиеван патай С.Саидгьасановаз юбилей Савин Велиева мубаракна, адав рангунин принтер савкьат яз вахкана. Ахцегь райондин администрациядин ва жемятдин патай Сажидин Саидгьасановаз юбилей муниципалитетдин кьилин заместитель Роберт Гьамзаева мубаракна. Ада шаирдиз РД-дин культурадин лайихлу работник Энвер Асалиева чӀугунвай Ахцегьрин хуьруьн шикил пишкешна.
Сажидин Саидгьасановаз «Лезги газетдин» редакциядин, ФЛНКА-дин ва Алкьвадар Гьасанан тӀварцӀихъ галай центрадин патай юбилей Мегьамед Ибрагьимова мубаракна. Вичин рахунра ада къейд авурвал, Сажидин Саидгьасанов алай вахтунда «Лезги газетдихъ» галаз алакъа хуьзвай виридалайни яшлу мухбир я.
Шаирдиз юбилей мубарак авурбурун арада мад Агъа СтIалрин юкьван мектебдин директор Феликс Магьмудов, публицист ва гьикаятчи Рамазан Дадашев, Дербентдин экономикадин ва праводин колледждин векилар (директор – Насир Гьайдаров), филологиядин илимрин кандидат Сардар Абил, лезги чIалан муаллимар, шаирар ва масабур авай.
Мярекатдин сергьятра аваз, Сажидин Саидгьасанован 90 йисан юбилейдиз талукьарнавай концертни кьиле фена. Ана машгьур манидарри, СтIал Сулейманан районда авай РФ-дин халкьарин адетдин меденият-дин центрадин артистри, аялрин бахчайра авай, мектебра кIелзавай аялри иштиракна. Кьилди къачуртIа, абурун арада Омар Меликов, ашукь Айдун, Къагьриман Ибрагьимов, Седакъет Саидова ва масабур авай. Агъа СтIалрин, Цмуррин юкьван мектебра кIел-завай аялри шаирдин эсерар хуралай кIелна.
Медениятдин макандин фойеда Сажидин Саидгьасанован 90 йис тамам хьуниз бахшнавай выставкайри мярекатдин иштиракчийрин фикир желбзавай.
Агьмед Магьмудов
