Мубаракрай!
Фарид Шамсудинов 1963-йисан 3-июндиз Мегьарамдхуьруьн райондин ЦIелегуьнрин хуьре колхозчи, харат устIар Эфендидин хизанда дидедиз хьана. Школада амаз, адан рикI ктабар кIелунал, музыкадал, искусстводал алай. Жавандихъ артист хьунин мурадни авай. Гьавиляй школа куьтягьай гада Дагъустандин культпросветучилищедин актервилин устадвилин отделенидик экечIна. Санал кIелзавайбурухъ галаз училищедин сегьнеда эцигзавай тамашайра къугъвана, муаллимриз тамашаяр эцигиз куьмекар гана.
Советрин Армияда къуллугъдайла, Фарид къенепатан кьушунриз акъатна. Кьве йисуз аскерди Харьковда къуллугъна. Ам армиядин жергейрай старшина яз хтана, яни аскервилин буржи тарифлудаказ, чешнелудаказ кьилиз акъудна.
Аскервилин партал дегишарай жегьил яшайишдин, хизандин къайгъуйра гьатна. Диде-бубадин меслятдал разивал къалурна, Фарида вичин хивез рагьметдиз фейи стхадин хизанни хуьн къачуна.Искусстводин рекьяй кIелунар давамар хъувуникай рахун герек амачир. Старшина республикадин МВД-дин Махачкъала шегьердин Советский райондин милициядин отделда кIвалахал акъвазна. Йисарни Советрин Союз чкIай, республикада бандитрин, террористрин кIеретIар гзаф хьайибур тир. Йикъаралди дежурствода амукьай вахтар, террористрин вилик пад кьадай серенжемра иштиракай, хизан къалабулухдик акатай гьалар пара хьана. Нубатдин сеферда Фарида «Каспий» мугьманханада кIеви хьанвай бандит кьунин серенжемда иштиракна. Ам бандит авай кIвализ айвандикай чинеба гьахьна ва тахсиркар кьуна. Ихьтин кьегьалвиляй адаз медаль гана. Вичин къуллугъдин везифаяр касди гьамиша ян тагана кьилиз акъудна. Са шумуд йисуз Фарид Эфендиевича МВД-дин Мегьрамдхуьруьн райондин отделдани къуллугъна.
Офицерди, подразделенидин командирди намуслувилелди чIугур зегьмет МВД-дин руководстводи са шумудра къейдна.
Фарид Шамсудинова уьмуьрдин юлдашдихъ галаз санал кьуд веледдизни хъсан тербия гана. Кьилин образование къачунвай абуру жуьреба-жуьре хилера гьакъисагъвилелди зегьмет чIугвазва.
Алай вахтунда ял язавай офицерди вичин уьмуьрдилай разивалзава.
3- июндиз Фарид Эфендиевичан 60 йис тамам жезва. Юбилей адаз стхаяр Гьажиумара, Гьажиислама, вахар Асията, Сувара, веледри ва вири мукьва-кьилийри рикIин сидкьидай тебрикзава.
Къайдаяр хуьз, къуллугъ ийиз,
Вилик жергейра хьана вун.
Баркалла къвер крар ийиз,
Дережайрив агакьна вун.
Гурлу я ви умуьрдин гьал,
РикI кузвай багърийрихъ вири.
Берекатлу хьурай агьвал
Мубарак дем, хайи югъ ви.
«Лезги газет»
