9-июлдиз Сулейман-Стальский райондин Кьил Нариман Абдулмуталибова са шумуд хизандив шад гьалара «Кlанивиляй ва вафалувиляй» медалар вахкана.

Цlинин йисуз и лишанлу медалдиз кlанивилелди ва вафалувилелди яшамиш хьуналди хуьруьнвийрин арада мягькем хизан хьиз машгьур тир Мусаниф ва Шапери Ферзилаевар, гьакlни Абдулмежид Межидован ва Зоя Гьабибулаевадин хизанар лайихлу хьана.

Медалар вахкунин шад мярекатда райондин кьилин сад лагьай заместитель Лацис Оружева, райондин УСЗН-дин начальник Жавидин Бремова ва райондин информациядин агентстводин руководитель Жабраил Асланова иштиракна.

Хизандин, кlанивилин ва вафалувлин йикъан сергьятра аваз чешнелу, гзаф йисара санал ислягьвилелди, кlанивилелди уьмуьр кьиле тухвай, аялриз, хтулриз, штулриз лайихлудаказ тербия гайи, жемиятдин уьмуьрдик еке пай кутур хизанар медалралди къейд авун хъсан адетдиз элкъвенва.

Тlвар кьунвай медаль «РФ-да хизандин, кlанивилин ва вафалувилин югъ» кьиле тухунин тешкиллувилин комитетди тестикьарнавай общественный шабагь я. Общественный и шабагь эвленмиш хьайидалай инихъ 25 йисалайни гзаф уьмуьр вафалувилелди кечирмишзавай хизанриз гузва.

Къейд ийин, 2008-йисалай инихъ Сулейман-Стальский райондин 20-далайни гзаф хизанар ихьтин шабагьдиз лайихлу хьанва.

Лайихлу хизанрив шабагьар, грамотаяр ва цуьквер вахкуналди, райондин Кьил Н.Абдулмуталибова хизанриз сагълам мягькемвал ва яргъи уьмуьр тlалабна.

«Лезги газет»