Алатай гьафтеда Башкортостандин меркез Уфа шегьерда япариз зайифдаказ ван къвезвай спортсменрин арада дзюдодай Россиядин чемпионат кьиле фена. Дагъустандин хкянавай командадик кваз ана иштиракай чи ватанэгьли Назим Сайидова 60 кг-дин заланвал авайбурун арада къизилдин медаль, гила 3-сеферда, Россиядин чемпионвилин тIвар къазанмишна. Аферин!

РикIел хкин: ери-бине Мегьарамдхуьряй тир Н.Сайидова тренер Садир Айвазован гъилик устадвал хкажзава. Спортдин кесерлу майданра ада икьван гагьдини гьунарар садрани-кьведра къалурнавач. Кьилди къачуртIа, ада 2021-йисуз Франциядин Версаль шегьерда япариз зайифдаказ ван къвезвайбурун арада дзюдодай дуьньядин чемпионвилин тIварни къазанмишна.

Гила Назима июлдин эхирра ва августдин эвел кьилера Уфада кьиле фидай Сурдалимпиададин гатун Къугъунриз гьазурвал аквадайвал я.

Рагнеда Рамалданова