И йикъара Докъузпара райондин Миг­рагъа путар (гиряяр) хкажунин спортдай республикадин III фестиваль кьиле фена. Ана Дагъустандин жуьре­ба-жуьре шегьеррайни районрай тир спортсменри иштиракна. Абуру, РД-дин спортдин и жуьредай федерацияди тайинарнавай къайдайрал асаслу яз, 13 дисциплинадай чпин гьунарар къалурна.

Идакай чаз райадминистрациядин пресс-къуллугъди хабар гана. Макьсад республикада спортдин и жуьре вилик тухун ва машгьурун тир и серенжем Докъузпара райондин администрациядин куьмекни­ галаз тешкилайбур РД-дин физический культурадинни спортдин минис­терство ва «Вирироссиядин гиряйрин спортдин федерация» общественный тешкилатдин Дагъустандин отделение тир.

Фестиваль ачухуниз талукьарнавай мярекатдал РД-дин гиряйрин спортдин федерациядин президент Магелан Саидова, Докъузпара райондин кьилин заместителар тир Салигь Гьажимурадова ва Марат Крымова, райадминистрациядин спортдин, жегьилрин сиясатдин ва туризмдин рекьяй отделдин начальникдин везифаяр тамамарзавай Имиржан Алискерова ва масабуру мугьманарни  спортсменар чими келимаяр лугьуналди къаршиламишна, спортсменрихъ агалкьунар хьун алхишна.

Итижлудаказ кьиле фейи фестивалда гъалибвал къазанмишай ва приздин чкаяр кьур спортсменриз адан тешкилатчийри медалар, дипломар ва спортдин та­даракар гана. Виридалайни хъсанбур  Докъузпара райондин администрациядин патай пулдин пишкешар гуналди къейдна.

Р.Рамалданова