Машгьур лезги, дипломат, журналист, Туьркияда Россиядин векил Алаудин Ярагьмедован хизанда Москвада дидедиз хьайи Дианади Туьркияда художественный гимнастикадиз сифте камар къачунва. ГъвечIи спортсменкадин вад йисни зур я. Ада Стамбул шегьердин «Ритмика Джимнастик» спортдин клубда художественный гимнастикадин рекьяй Туьркиядин хкягъай милли командадин чIехи тренер Нигьан ханум Суьзен-Озканан регьбервилик кваз вердишвилер къачузва.
Пуд йис тамам хьайидалай инихъ гимнастикадал машгъул жезвай Дианадихъ акъажунра агалкьунарни хьанва: 2022-йисан декабрдиз ада Стамбул шегьерда, жуьт-жуьт хьана, алакьунар къалурзавайбурун сад лагьай акъажунра – Туьркиядин «Ритмикадин хъуьтIуьн кубок» клубдин чемпионатда – иштиракна ва гимишдин приздин чка кьуна. И акъажунра Диана яшдиз виридалайни гъвечIи спортсменка тир.
5-майдиз Стамбулда кьиле фейи Туьркиядин умуми «Baby Cup 2023» IV турнирда Диана Ярагьмедовадикай кишпирдин приздин сагьиб хьана. Аялри художественный гимнастикадай кьилди-кьилди алакьунар къалурай и акъажунар гегьеншбур тир – ана 36 клубдай 394 касди иштиракна.
Художественный гимнастика Россиядани, Туьркиядани спортдин машгьур, гуьрчег жуьрейрик акатзава. Гьа са вахтунда ам четиндини я.
Къейд ийиз кIанзава, гъвечIи спортсменка Дианадин диде-бубани чпин вахтунда спортдиз майилвал авурбур я. Диде Регина Елисеева спортдин аэробикадал машгъул хьана, Махачкъалада дидедиз хьайи буба Алаудин Ярагьмедов – кик-боксингдай спортдин мастер я. Алай вахтунда ам Туьркияда Россиядин алишверишдин векилханада меслятчи я.
К.Ферзалиев
