Дагъустан ва Тажикистан яшайишдин
жуьреба-жуьре хилера санал кIвалахунин гьакъиндай икьрар хьана
30-майдиз РД-дин Кьил Сергей Меликова Махачкъалада Урусатда Тажикистандин Векил Давлатшох Гулмахмадзодадихъ галаз гуьруьш кьиле тухвана. Идакай «Лезги газетдиз» Дагъустандин Кьилин пресс-къуллугъди хабар гана.
«Дагъустан, Тажикистан хьиз, Дагъларин уьлкве я. Куьн асирралди жуьреба-жуьре халкьар арада дуствал, стхавал аваз яшамиш жезвай чи республикадихъ галаз мукьувай таниш хьунал чун шад жеда», — лагьана Сергей Меликова.
Гуьруьшдин вахтунда абуру кьве республикадин арада алишверишдинни экономикадин, яшайишдинни медениятдин амадагвилин алакъаяр вилик тухуниз талукь месэлаяр веревирдна. Кьилди къачуртIа, Сергей Меликовни Давлатшох Гулмахмадзода якIун суьрсетдикай, памбаг гьасилуникай, хуьруьн майишатдин суьрсет хуьдай логистикадин центраяр эцигуникай, туризм, карчивал вилик тухуникай, медениятдин, илимдин, спортдин рекьерай алакъаяр мягькемаруникай рахана.
Векилди къейд авурвал, Тажикистанди Кеферпатан Кавказдин республикадихъ алишверишдинни экономикадин жигьетдай амадагвилин алакъаяр хуьниз, Дагъустандин карчийрихъ галаз санал цIийи карханаяр эцигуниз итиж ийизва.
Туризмдикай рахадайла, Тажикистандин делегацияди РД-дин туризмдин ва халкьдин яратмишунрин сеняткарвилерин министерстводин векилриз чпин республикадиз мугьман хьун теклифна. Вичин нубатда Сергей Меликовани мугьманриз Расул Гьамзатован юбилейдиз талукь мярекатра иштиракун патал мад сеферда Дагъустандиз атуниз эвер гана.
Къейд ийин хьи, делегация Дагъустанда хьайи кьве юкъуз РД-дин алишверишдинни промышленностдин палатадин кIвалахдихъ галаз таниш хьана, карчийрихъ галаз кьиле фейи совещанида иштиракна, вузриз мугьман хьана, Тажикистандай атана, Дагъларин уьлкведа жуьреба-жуьре вузра чирвилер къачузвай студентрихъ галаз гуьруьш кьиле тухвана.
Агьмед Магьмудов
