ЦIи Дагъустандин журналистрин Союздин цIийи председатель хкяда

Алатай гьафтеда Дагъустандин СМИ-рин уьмуьрда лишанлу ва­къиа кьиле фена: РФ-дин журналистрин Союзди РД-дин информациядин ва печатдин Агентстводин куьмекдалди Махачкъалада «Инфорум» лишандик кваз журналистар патал чIехи мярекат тешкилнавай. Москвадай атанвай мугьманрин арада Союздин председатель Владимир Соловьев, «Россия 24» телеканалдин отделдин начальник Виталий Арутюнян, Союздин секретарар тир Юлия Загитова, Денис Токарский, Тимур Шафир, телерадиоведущий Трофим Татаренков авай.

«Инфорум» ачухуниз талукьарнавай асул паюна Владимир Соловьева, РД-дин Гьукуматдин Председателдин заместитель Рамазан Жафарова, РД-дин информациядин ва печатдин Агентстводин кьил Абдуразакь Жамалутдинова иштиракна.

Форумдин асул макьсадрикай Вла­димир Соловьева лагьана. Адан гафарай малум хьайивал, федеральный дережадин и проект уьлкведин 50-далай виниз регионра кьиле фена. Адан сергьятра аваз экспертри регионрин журналистриз мастер-классар къалурзава, пешекарвилин рекьяй меслятар къалурзава, СМИ-рин векилриз тежриба гегьеншардай мумкинвал гузва.

«Зун Дагъустандиз виликдайни мугьман хьайиди я. Ина захъ журналистрин арада гзаф чирхчирар ава. Чна тешкилнавай мярекат куьн паталди итижлуди, менфятлуди жедайдак еке умудар кутазва», — лагьана В.Соловьева.

Гуьгъуьнлай рахай Рамазан Жафарова алай аямдин шартIара СМИ-риз талукь яз ихьтин мярекатар тухунихъ еке метлеб авайди къейдна. «Журналистар патал ихьтин форум чи республикада сифте яз тухузва. Са шакни алачиз, ада чкадин СМИ-ра кIвалахзавайбуруз цIийи чирвилер гуда. Форум Р.Гьамзатован 100 йис тамам хьуниз талукьаруни мярекатдин метлеблувал мадни артухарзава».

Мярекатдал рахай «Институт развития новых медиа» АНО-дин регьбер Мухтар Амирова Дагъустанда­ Расул Гьамзатован уьмуьрдин ва яратмишунрин рекьиз талукьарнавай кьилдин сайт арадал гъанвайдакай хабар гана.

Рамазан Жафарова са жерге журналистрив государстводин шабагьар вахкана. ИкI, «РД-дин лайихлу журналист» тIварцIиз лайихлу хьайибурун арада «Лезги газетдин» кьилин редактор Мегьамед Ибрагьимов, «Дагестанская правда» газетдин векилар — Жангиши Гьадисов, Гъази Гьа­сайни­ев, Тимур Кушенко, Тамерлан Мусаи­дов ва Абдула Сулейманов ава. ГьакIни Владимир Соловьеваз Дагъус­тандин Кьилин тIварцIин сятни гана.

Гуьгъуьнлай Москвадай атанвай­ мугь­манри чкадин журналистар па­тал­ мастер-классар къалурна, со­ци­альный­ сетра кьиле тухузвай кIв­алахдиз, те­лег­рам-каналар вилик тухуниз, малу­матрин къалп чешмеяр­ тайинардай­ къайдайриз, тайин са месэладин гьа­къиндай баянар гудай­бурухъ галаз кIвалах тешкилуниз ва ма­са месэлайриз талукь лекцияр тухвана­.

«Инфорумдин» сергьятра аваз «Лезги газетдин» чешнедал «Дагъус­тандин милли чIаларал акъатзавай газетар вилик тухун» темадай изданидин кьилин редактор­ Мегьамед Ибрагьимова доклад авуна. Ада газетдин тираж артухарун, интернетдин­ майданра тешкилнавай кIвалах вилик тухун патал редакцияди кьабулзавай сер­енжемрикай, кьилиз акъудзавай проектрикай гегьеншдиз суьгьбетна. РикIел хкин, алай вахтунда «Лезги газет», тираждал гьалтайла, Да­гъустандин государстводин СМИ-рин арада 1-чкадал ала. Хайи чIал хуьн ва вилик тухун патал редакцияди 10-далай виниз проектар кьилиз акъудзава. Абурун арада «Лезги газет» — гьар са кIвализ», Каспийск, Махачкъала шегьеррин ва Кьиблепатан Дагъустандин районринни шегьеррин мектебра кIелзавай аялрин арада гьар йисуз лезги чIалай тешкилзавай олимпиадаяр, «Халкьдин кимел», «Лезги чIалал – онлайн-курсар», «Лез­ги чIалай ктабар», диндин конкурс, лезги публицистикадай студент­рин арада тухузвай конкурс, редакциядин премиярни гьар йисуз газет кIелзавайбурун арада тешкилзавай конкурсар ва «Лезги диктант» проектар ава. Абурукай бязибур маса тешкилатрихъ галаз санал кьилиз акъудзава.

Эхирдай Владимир Соловьева, СМИ-рин векилрин суалриз жавабар гудайла, къейд авурвал, мукьвара Дагъустандин журналистрин Союздин цIийи председатель хкягъун патал Махачкъалада конференция кьиле фида. Аниз РФ-дин журналистрин Союздин векиларни къведа.

«Дагъустан гзаф миллетрикай иба­рат республика я. Ина итижлу СМИ-ярни тIимил авач. Дагъустандин журналистри РФ-дин журналистрин Со­юзди тешкилзавай вири проектра, форумра, фестивалра иштиракун лап важиблу я. Алай вахтунда уьлкведа чи Союздин 89 отделение ава. Дагъус­тандин журналистрин Союз мадни вилик фидайдак за умуд кутазва», — лагьана В.Соловьева.

Агьмед Магьмудов