И мукьвара Баку шегьердин Гь.Алиеван тIварунихъ галай кьилин дараматда  лезги халкьдин манияр лугьудай ва кьуьлердай “Сувар” ансамблдин концерт кьиле фена. 2000 кас гьакьзавай зал тамашачийрив сиве-сивди ацIанвай. Ансамблдин регьбер Завир Нажафова туькIуьрнавай  кьуьлерин 3 дестедин аялри, на лугьуди, имтигьан вахкузвай.  Сад-садалай иер кьуьлер, кьуьлерин композицияр тамамарна. Яшариз килигна (3-17 йисар), 3 дестедиз пайнавай аялри сегьнеяр къалурна.

Шад жедай кар ам я хьи, чаз чIехи сегьнедилай микрофонрихъай кичIе тушир, тIарам ва иер кьуьлериз чидай цIийи несил арадал атанвайди акуна. З.Нажафова сегьнедал акъудай 100-лай виниз аялрин рикIерин цIаяри, абурун кьуьлерин тIарамвилери чазни екез таъсирна.

Концертдин дережа мадни виниз хкажай  манидаррин арада чаз виридаз чизвай Руслан Пирвердиев, Жавагьир Абдулова, Роза Гьажимурадова, Жамиля Залова, Рашад Ибрагьимов, Рамил Ражабов, Бегьруз Гьажибеговни авай.

Мярекатда Закаталдай атанвай аварви манидардини, Масаллыдай — талышрин ансамблдини иштиракна.

Абир  ЭчIехви