23-майдиз Дагъустан Республикадин Кьил Сергей Меликова регионда школаяр эцигунин ва ремонт авунин гьалдиз талукьарнавай совещание кьиле тухвана. Мярекатда Россиядин Федерациядин просвещенидин министрдин заместитель Андрей Николаева (ВКС-дин къайдада), республикадин ва муниципальный органрин кьилери, пудратдин организацийрин векилри иштиракна.
“Апрелдин вацра Дагъустан Республикади, РФ-дин просвещенидин министерстводин векилрин иштираквални аваз, Россиядин оборонадин министерстводихъ галаз икьрардал къулар чIугунай. Терефри регионда образованидин объектар эцигуниз ва ишлемишиз вахкуниз талукь мажбурнамаяр хиве кьунай. Чна абур кьилиз акъудун лазим я. Идалайни гъейри, са йис вилик за мажбурнама тамамарда лагьана гафни ганай. И карда заз манийвал гудай къуллугъчияр хьайитIа, за абуруз талукь яз кIеви серенжемар кьабулда”, — малумарна Сергей Меликова.
Дагъустанда 2023-йисуз республикадин ва федеральный программайрин сергьятра аваз образованидин 90 дараматдин проектар гьазурунин ва абур эцигунин кIвалах кьиле физва. “Образование” ва “Демография” милли проектрин сергьятра аваз 50 школа ва аялрин 8 бахча эцигда.
Республикадин 36 муниципалитетдин мулкара авай 139 школа капитальнидаказ ремонт авуникай ихтилат фейила, Сергей Меликова и проект уьмуьрдиз кечирмишун шаклувилик кутунач. Талукь организацийрихъ галаз икьрарар кутIуннава, школаяр ремонт авунин кIвалахрив эгечIнава.
“Еришар хъсанбур я, амма къведай йисуз чна вири кIвалахар акьалтIарун герек я. Заз муниципальный тешкилатрин регьберриз лугьуз кIанзава: школаяр чи аялар шадардайвал ремонтна кIанда. Школайрин гьаятар, къваларив гвай чкаярни аваданламишун, спортдин майданар туькIуьрун, инновациядихъ галаз алакъалу месэлаяр гьялунни фикирдай акъудна кIандач, лап гъвечIи школайрани”, — лагьана Дагъустандин Кьили.
Ада гьакIни образованидин идараяр террористрин гьерекатрикай, цIаяр кьуникай хуьдай серенжемар таъминаруниз, школайрин материальный база вилик тухуниз кьетIен фикир гана кIанзавайдакай малумарна.
Андрей Николаева къейд авурвал, инфраструктурадиз ассигнованийрал ва регионда эцигзавай, ишлемишиз вахкузвай дараматрал гьалтайла, Дагъустанди уьлкведин регионрин арада 1-чка кьазва.
“Чна сифте нубатда инсанар патал кIвалахзава. Чи аялриз 1-сентябрдиз цIийи школадиз фидай вири жуьредин ихтиярар ава, эгер чна абуруз и кар хиве кьунватIа. Эцигзавай гьар са объектдин патахъай талукь ксарин хиве еке жавабдарвал ава”, — лагьана Россиядин просвещенидин министрдин заместителди.
А.Николаева къейд авурвал, школаяр капитальнидаказ ремонт авунин жигьетдай республикади вич лайихлувилелди къалурна. “Имни, Сергей Алимович, Куь кIвалахдихъ, и кардал герек къуватар желб авунихъ галаз алакъалу я. За алатай йисан нетижаяр хушвилелди рикIел хкизва, гьикI лагьайтIа, маса регионрив гекъигайла, Дагъустанди гзаф объектар эцигна кIанзавай, и кар кьилизни акъудна. Июндин юкьварилай чна 2024-2026-йисара капитальнидаказ ремонт авуниз талукь арзаяр кьабулда ва хкяда. Уьлкведин Президентдин тапшуругъдалди 2025-йисуз и программадиз ахъайзавай финансрин кьадар артухарда. Аялрин бахчаяр ремонт авуниз чара ийизвай пулдин кьадарни гзафарда. Гьавиляй гиламаз и хилерай республикадихъ авай игьтияжар тайинара”, — лагьана Андрей Николаева.
РД-дин эцигунрин, архитектурадин ва ЖКХ-дин министр Артур Сулейманова хабар гайивал, гъилевай йисуз Дагъустанда образованидин гзаф дараматар ишлемишиз вахкуда. Исятда вири эцигунрал, графикда къалурнавай вахтарал амална, кIвалахар кьиле физва.
Артур Сулейманова малумарайвал, образованидин 88 дараматдикай 34-даз лицензияр гунин кIвалах тешкилнава. 54 объектдал йисан эхирдалди кIвалахар куьтягьда.
Эцигунринни монтаждин кIвалахар акьалтIарзавай, 1-сентябрдалди лицензияр къачузвайбурук Махачкъаладин “Ипподром” районда, Бабаюрт райондин Львовское, Сергокъала райондин Миглакасимахи, Хунзах райондин Арани ва Мегьарамдхуьруьн райондин Самур хуьрера эцигзавай школаяр акатзава.
“Вири месэлайриз талукь яз алай вахтунда муниципалитетрихъ галаз сих кIвалах тухузва. Абурун патай са манийвални авач. ЦIийи дараматриз талукь рекьер, газдин, электричестводин, цин линияр тухунни фикирдай акъудзавач. И крар патал алава такьатарни чара авунва”, — гъавурда туна А.Сулейманова.
Хийир Эмиров
