26-майдин сятдин 11-даз Кьасумхуьрел, И.Тагьирован тIварцIихъ галай медениятдин маканда, Дагъустандин халкьдин шаир Сажидин Саидгьасанован 90 йисан юбилейдиз талукьарнавай мярекат кьиле фида.
Шаирдиз и шад вакъиа мубаракиз республикадин жемиятдинни сиясатдин векилар, алимар, писателар, журналистар, милли эдебиятдал рикI алайбур къведа. Мярекатда ашкъи авай гьар садавай иштиракиз жеда.
Сажидин Саидгьасанов лезги кIелзавайдаз фадлай таниш я. Шаир, гьикаятчи, публицист, драматург, таржумачи, журналист, муаллим, насигьатчи… Аллагьди адаз жуьреба-жуьре рекьерай захавилелди алакьунар ганва. Шаирдин къелемдикай цIудралди ктабар хкатнава, адан хейлин эсерар жуьреба-жуьре чIалариз таржума авунва, Лезги театрди адан пьесайрай са шумуд тамаша къалурна, композиторри адан чIалариз гьаваяр теснифна.
Хейлин йисара милли эдебиятдин хиле бегьерлудаказ зегьмет чIугунай, Дагъларин уьлкведин эдебият вилик тухуник кьетIен пай кутунай Сажидин Саидгьасановаз алай йисуз РД-дин Кьил Сергей Меликован Указдалди “Дагъустандин халкьдин шаир” лагьай гьуьрметдин тIвар гана.
«Лезги газет»
