РД-дин информациядин ва печатдин Агентстводи “Дагъустан” Этномедиахолдинг” ГБУ арадал гъидай чIавуз аник акатзавай республикадин хайи чIаларал акъатзавай газетрин чинрин ва редакцийра кIвалахзавайбурун кьадар сад хьтинди ийидай къарар кьабулнай. Кьилди къачуртIа, авар, дарги, къумукь, лезги, яхул чIаларал акъатзавай газетрин чинрин кьадар 16 ва редакцийрин къуллугъчийрин кьадарни 19 кас хьун лазим тир. Амма цIийи тешкилат арадал гъайидалай кьулухъ авар чIалал акъатзавай газетдин чинрин ва а редакциядин къуллугъчийрин кьадар амайбурулай гзаф яз амукьна. Ихьтин гьахъсузвилихъ галаз рази тахьана, лезги жемиятдин са дестеди (Гьаким Къурбана, Азедин Эсетова, Омар Гьуьсейнова, Пакизат Рагьимхановади, Альберт Эседова) РД-дин Кьилин, Гьукуматдин ва Халкьдин Собранидин Председателрин, РД-дин милли сиясатдин ва динрин крарин рекьяй министрдин тIварцIел арза рекье туна.
18-майдиз РД-дин Халкьдин Собранида милли сиясатдин, жемиятдин, диндин тешкилатрин месэлайрин, парламентрин арада алакъайрин рекьяй кардик квай Комитетдин председатель Фирудин Ражабован регьбервилик кваз арзада къарагъарнавай месэлаяр веревирдна.
Мярекатда РД-дин информациядин ва печатдин Агентстводин регьбердин заместитель Аслудин Мегьамедова, “Лезги газетдин” кьилин редактор Мегьамед Ибрагьимова, алим Гьаким Къурбана, Махачкъалада авай лезгийрин милли тешкилатдин кьил Пакизат Рагьимхановади ва жемиятдин векил Альберт Эседова иштиракна.
Эвел кьиляй Мегьамед Ибрагьимова эхиримжи йисара “Лезги газетдихъ” хьанвай агалкьунрикай, редакцияди кьиле тухванвай кIвалахрикай куьрелди суьгьбетна ва газет гьам тираждал, гьамни интернетда тешкилнавай кIвалахдал гьалтайла, республикадин милли чIаларал акъатзавай изданийрин арада 1-чкадал алайдакай хабар гана.
Фирудин Ражабова вич арзада къарагъарнавай саки вири месэлайрихъ галаз рази ва вири изданийрив са къайдада эгечIун герек тирди къейдна. Ада гуьруьшдин иштиракчияр лезги жемиятдин векилрин арзадин гьакъиндай РД-дин Халкьдин Собранидин тIалабуналди информациядин ва печатдин Агентстводи хганвай жавабдихъ галаз танишарна. Анай малум жезвайвал, йисан эхирдалди авар чIалал акъатзавай газет, виликдай хьиз, 24 чин аваз чап авун давамарда. И кардин себеб ам я хьи, газет кIелзавайбуру алатай йисан эхирра подписка ийидайла, 24 чин авай газетдин пул ганва. Идалайни гъейри, государстводин тапшуругъдани “Гьакъикъат” газет 2023-йисуз 24 чин аваз акъудун къейднава. Къведай йисалай лагьайтIа, ам, амай газетар хьиз, яни 16 чин аваз акъатда.
Редакцияда кIвалахзавай къуллугъчийрин кьадардикай рахайтIа, амай редакцийра 19 кас аватIа, авар чIалал акъатзавай газетдин редакцияда цIи 20 кас амукьда. Къведай йисуз абурун кьадар садан тIимил жеда.
И делилар гуьруьшдал рахай РД-дин информациядин ва печатдин Агентстводин кьилин заместитель Аслудин Мегьамедовани тестикьарна.
Гуьруьшдин эхирдай Фирудин Ражабова вичи регьбервал гузвай Комитет ва республикадин Халкьдин Собранидин депутатар гьамиша жемиятдин, СМИ-рин векилрихъ галаз алакъаяр хуьз, абурун меслятрихъ, теклифрихъ яб акализ гьазур тирдакай лагьана.
Агьмед Магьмудов
