ЦIийи къайда кардик кутада

Высший образованидин цIийи къайда уьлкведин гьар жуьредин вузра алай йисуз ахтармишда. Ида­кай РФ-дин  илимдин ва образованидин министр Валерий Фалькова хабар гана.

Илимдин ва образованидин министерстводин пландик цIийи системада  гьам бакалавриатдикай, гьам магистратурадикай ва гьамни специалитетдикай  кьил къакъудун, гьа са вахтунда абур  бинелу высший ва пешекар высший образованийралди  эвез авун ква. Идалайни гъейри, фикирда аспирантура образованидин пуд лагьай дережа яз еримлу авун  ава.

Бинелу высший образованидин  сергьятра аваз пешекарар гьазурун 4 йисалай 6 йисал кьван давам жеда. ЦIийи къайдада магистратура пешекар высший образованидалди эвезда. Идалайни гъейри, аспирантура виликди тухуниз кьетIен фикир гуда.

Алай йисуз акьалтIарда

2023-йисан эхирдалди Дагъустанда цIийи 36 мектеб ва аялрин бахчаяр эцигда. Идакай РД-дин эцигунрин, архитектурадин ва ЖКХ-дин министр Артур Сулейманова хабар гана. Адан гафаралди, алай йисуз  республикада федеральный ва республикадин бюджетрин гьисабдай образованидин 94 объ­ект эцигунин кIвалахар кьиле физва­.

Планда къалурнавайвал, йисан эхирдалди  32 мектебни аялрин 4 бахча  ишлемишиз вахкун таъминарда. Эцигунрин кIвалахар объ­ект­рал тамамдаказ акьалтIар­дай­вал я, и кар себеб яз абур 2024-йи­суз ачухуниз гьазурвал аквадай мум­кинвал жеда. Мад 28 мектеб ва аял­рин 30 бахча, лицензияр гайидалай кьулухъ алай йисан вахтунда ачухда. Идахъ галаз сад хьиз, яшайишдин рекьяй важиблу са жерге маса объектарни эцигунин кIвалахар давам жезва: культурадин 3 объект, спортдин — 1 ва коммунальный къурулушдин — 37.

Мумкинвилер ачухда

РД-дин карчивилиз куьмек гунин “Зи бизнес” центради “Карчивилин фабрика. Аялар” проектдихъ галаз санал, “ГъвечIи ва юкьван карчивал” милли проектдин сергьятра аваз, Махачкъала шегьердин мектебра  аялриз ва жаванриз  карчийри хьиз фикириз чирдай курс кардик кутунва.

Проектда 100 аялди ва 4 школади —  МБОУ 5, МБОУ 7, МБОУ 27, МБОУ 58 — иштиракзава. “Карчивилин фабрика. Аялар”  — им 8 йисалай­ 16 йисал кьван яшда авай ая­лар патал образованидин прог­рамма я. Адан бинеда аялрин яратмишунрин мумкинвилер ачухун ва абурун карчивилин гьиссер —  кIвен­кIвечивал, вилик макьсад эцигун, планар туь­кIуьрун, сад масадахъ галаз алакъа­лу хьун — винел акъудун ава.

Курсунин сергьятра аваз аялриз хсуси бизнес-проектар арадал гъиз, мукьва рехъ хкягъиз, бизнес-планар туькIуьриз, абур социаль­ный сетра виликди тухуз, гьакIни карчийри хьиз фикир ийиз, жемятдин вилик экъечIна, рахаз чирда.  Курсуна иштиракун пулсуз я.

«Лезги газет»