РД-дин транспортдин ва рекьерин ма­йишатдин министерстводин  государстводин программа уьмуьрдиз кечирмишунин  сергьятра аваз   чкадин важиблувилин “Къурукал-Хинер” рекьин 6 километрдин участок  бинедилай  ремонт авунин кIвалахар кьиле физва. Идакай идарадин пресс-къуллугъди хабар гузва.

“Рекьи Ахцегь райондин са шумуд хуьр райцентрадихъ, гьакIни республикадин кар алай рекьерихъ галаз алакъа­лу ийизва,  республикадин важиблувал авай “Мегьарамдхуьр-Ахцегь-Рутул” шегьредал экъечIдай мумкинвал гузва. Райондин экономика ва яшайиш патал им важиблу делил я. Идалайни гъейри, рекьихъ хатасузвилин жигьетдай ва­жиблувал ава, гьикI ла­гьай­тIа, ада  пог­ра­ничникрин заставайрив агакьарзава”, — къейдава малуматда.

Бинедилай ремонтдин сергьятра аваз, ина рекьин чилин къат, нормативри истемишзавайвал, гегьеншарда. ГьакI­ни даяхар жедай цлар эцигда, артухан кьеж хкудун патал турбаяр туху­да­, къир цада. Идалайни гъей­ри, рекье гьерекат хатасуз авун патал лазим серенжемар кьабулда, гьа жергедай яз, ре­кьин­ къерехрай жугъун чIуг­вада, рекьерин лишанар эцигда, разметка ийида.

“Къенин юкъуз шегьре мягькемарунин, даяхар туькIуьрунин кIвалахар тамамдаказ акьалтIарнава. Яд фидай турбаяр чкайрал тайинарунин кIвалахар эхирдив агакьзава. Идахъ галаз сад хьиз рекье къир цазва”, — лагьана чаз  министерстводин векилди.

Адан гафаралди, гьар юкъуз объект­дал махсус техникадикай тир 25 машинди кIвалахзава. КIвалахар июндин эхирдалди тамамдаказ  акьалтIарун ва 6 километрдин участок  ишлемишиз вахкун пландик ква.

Министерстводин пресс-къуллугъди алава хъувурвал, алай йисуз и ре­кьин­  6 ва 9 лагьай километрийрин арада­ авай участокни бинедилай ремонт авунин кIвалахар гъиле кьада ва абур 2024-йисуз акьалтIарда.

Амина Муслимова