Гатун вахтунда аялри ял ягъун патал Дагъустандин жуьреба-жуьре пипIера лагерар кардик акатнава. “Лезги газетдиз” Мегьарамдхуьруьн райондин администрациядин пресс-къуллугъди хабар гайивал, муниципалитетдин юкьван образованидин вири идарайра лагерар ачухнава. Абуру 21 юкъуз кIвалахда.

Школайрин патарив ачухнавай лагеррин кьилин макьсад аялриз сагъламвал мягькемардай, чпихъ авай алакьунар еримлу ийидай шартIар тешкилуникай ибарат я. Виликамаз гьазурнавай махсус пландин бинедаллаз, аялрихъ галаз сагъламвилин ва тербиядин рекьяй кьилдин кIвалахни кьиле тухузва.

Къейдна кIанда, Мегьарамдхуьруьн районда ачухнавай бязи лагерра ял язавай аялар Кьиблепатан Дагъустандин надир чкайриз сиягьатриз тухузва. Мисал яз, Мегьарамдхуьруьн 2-нумрадин юкьван школада кардик кутунвай лагерда авай аялар мукьвара Приморский хуьре гьуьлуьн кьерез, балугъар туьретмишзавай заводдиз ва Тагьирхуьруьн-Къазмайрилай тир Тимур Гьабибован ботаникадин багъдиз фена. Абур сиягьатдилай рази яз амукьна.

Чи мухбир