И йикъара Мегьарамдхуьруьн 2-нумрадин ДЮСШ-да жегьилрин арада волейболдай турнир кьиле фена. Идакай «Лезги газетдиз» муниципалитетдин райадминистрациядин пресс-къуллугъди хабар гузва.
Жегьилрин йикъаз ва район арадал атайдалай инихъ 75 йис тамам хьуниз талукьарнавай спортдин мярекат райондин жегьилрин крарин рекьяй тир отделди спортдин отделдихъ галаз санал тешкилна.
Волейболдин акъажунра райондин хуьрерин, тешкилатрин ва идарайрин жегьилрикай ибарат кьилдин командайри иштиракна. Акъажунар къизгъиндаказ, волейболистар ашкъилудаказ къугъуналди кьиле фена.
Турнирдин нетижайра сад лагьай чка Гъепцегьрин командади, кьвед лагьай чка МФЦ-дин командади, пуд лагьай чкани налогрин инспекциядин командади кьуна.
Гъалиб хьайи ва хъсан чкаяр кьур командаяр кубокралди, грамотайралди къейдна.
«Лезги газет»
