11-майдиз Дагъустан Республикадин Кьилин къвалав гвай илимдин, техникадин, литературадин, публицистикадин, искусстводин ва архитектурадин хилерай РД-дин госпремияр гудай комиссиядин заседание кьиле фена.
РД-дин Халкьдин Собранидин Председателдин заместитель Сайгидагьмед Агьмедован регьбервилик кваз кьиле фейи мярекатда РД-дин Халкьдин Собранидин депутатри, министерствойрин, ведомствойрин, яратмишдай коллективрин регьберри, жемиятдин тешкилатрин, СМИ-рин векилри иштиракна.
Республикадин жуьреба-жуьре идарайри премияр гудай комиссиядиз яратмишзавай ксарин 26 кIвалах теклифнавай. Литературадай -11, тIебии, жемиятдин илимрай ва техникадай — 8, публицистикадай — 3, театрдин искусстводай ва кинодай — 2, декоративно-прикладной искусстводай, архитектурадай ва эцигунрай — 2, музыкальный искусстводай — 1, Дагъустандин халкьдин шаир Расул Гьамзатован премия гун патални — 6 кIвалах.
Госпремия гун патал чи ватанэгьлийрин кIвалахарни къалурнавай: Москвадин физикадинни технический институтдин старший преподаватель Абдулгьамидов Низамидин “Етим Эммин (1840-1880)” ктаб (Дагъустандин шииратдин классикдин уьмуьрдикай, яратмишунрикай авунвай еке ахтармишун “Лезги газетдин” редакцияди къалурнавай) ва Смольный университетдин изобразительный искусстводин кафедрадин профессор Шагьмарданов Шарифан Ватандин ЧIехи дяведа къазанмишнавай Гъалибвилиз талукь памятник, ам Дербент шегьерда эцигнава), Хив райондин Кашанхуьруьн юкьван школадин математикадин муаллим Сефибегов Сефибеган “Инновациядин юкьван школадин чIехи классра кIелзавайбур математикадай вилик тухудай психологиядинни педагогвилин шартIар” ктаб.
Абад Азадов
