16-майдиз Сергей Меликова уьлкведин къецепатан крарин министерстводин (МИД) патав кардик квай РФ-дин субъектрин кьилерин Советдин заседанида иштиракна. Идакай “Лезги газетдиз” РД-дин Кьилин пресс-къуллугъди хабар гана.
Мярекатдал уьлкведин регионринни Центральный Азиядин уьлквейрин арада алишверишдинни экономикадин, медениятдин, яшайишдин маса хилерай амадагвилин алакъаяр вилик тухуниз, “Россия-Африка” саммитдиз гьазурвилер акуниз талукь месэлаяр веревирдна.
Вичин рахунра РФ-дин МИД-дин кьил Сергей Лаврова къейд авурвал, Урусатди Къазахстандихъ, Тажикистандихъ, Туьркменистандихъ, Узбекистандихъ галаз алакъаяр дуствилинни къуни-къуншивилин, сада-садаз гьуьрмет авунин бинедаллаз мягькемарзава. Ихьтин гьалара уьлквейрин арада сиясатдин диалог тухуни инвестицийрин жигьетдай амадагвилин алакъаяр вилик тухуз ва хейлин маса месэлаяр гьялиз куьмекзава.
Дагъустанди къецепатан уьлквейрихъ галаз хуьзвай алакъайрикай Сергей Меликова лагьана. Адан фикирдалди, географиядин жигьетдай Дагъустан алай чка фикирда кьуртIа, республикадихъ неинки са Закавказьедин, гьакIни Центральный Азиядин уьлквейрихъ галазни алакъаяр мягькемардай мумкинвилер ава.
Сергей Меликован гафаралди, 2022-йисан нетижайрай аквазвайвал, Кеферпатан Кавказдин республикади къецепатан уьлквейриз маса гузвай АПК-дин ва промышленностдин метягьрин кьадар артух хьанва. Кар алай амадагар тир уьлквейрин арада Къазахстан, Узбекистан ва Къиргъизистан ава.
Дагъустандин Кьили республикади къецепатан уьлквейрихъ галаз медениятдин рекьяй хуьзвай алакъайрикайни суьгьбетна. Кьилди къачуртIа, Дагъустандин халкьдин шаир Расул Гьамзатован 100 йисан юбилейдин сергьятра аваз Къазахстанда, Къиргъизистанда ва са жерге маса уьлквейра мярекатар кьиле фида.
Туризмдин рекьяйни Дагъустанди эхиримжи йисара хъсан нетижаяр къазанмишзава. С.Меликова хабар гайивал, Дагъларин уьлкведиз неинки са Урусатдин регионрай, гьакIни дуьньядин жуьреба-жуьре пипIерай туристар мугьман жезва. Ада гьакIни алава хъувурвал, республикади инлай кьулухъни Центральный Азиядин уьлквейрихъ галаз амадагвилин алакъаяр мягькемарда.
Агьмед Магьмудов
