Малум тирвал, Лезгинцевар гегьенш къатариз машгьур инсанар я. Чпин вахтара гьукуматдин дережада абуру тамамарай важиблу везифаяр неинки са лезгийриз, гьакI маса миллетризни фадлай чизва.
Са шумуд йис вилик а баркаллу ксариз памятник эцигунин кIвалах гъиле кьунай. Гьар жуьредин манийвилер хьуникди кар тамамариз алакьначир. Асул гьисабдай жавабдар кардив эгечIай Рамазан Ибрагьимхалилова тешкилай, амма, гьайиф хьи, акъвазай ва давамарна кIанзавай кардикай Нариман Ибрагьимова “Къагьриман рухвайриз — лайихлу гуьмбет” кьил ганвай нубатдин макъалада ачухдиз кхьенва. Ана къейднавай дуьз фикирар, делилар за тикрардач. Анжах секинвал тагузвай жуван фикиррикай бязибурал газет кIелзавайбур желб ийиз, Лезгинцевриз памятник эцигуниз куьмек яз, жуван рикIел вуч алатIа, мадни лугьуз кIанзава.
Эхь, гьуьрметлу стхаяр, вахар, Лезгинцевриз памятник эцигун къе чи эвелимжи буржи я. Четин девирда гьукумат мягькемаруниз чпин чирвилер, акьул, алакьунар серф авур, Ленинахъ, Сталинахъ, Свердловахъ галаз, гъил-гъиле кьуна, зегьмет чIугур Лезгинцевар хьтин игитриз памятник эциг тавуна, бес низ эцигда!? Четин, хаталу девирда Лезгинцеврилай ахьтин зурба крар алакьайла, чалай и бул девирда абуруз са памятник эцигиз, гъиле кьунвай хъсан кIвалах куьтягьиз жедачни? Мумкинвал лезгийрихъ авазва. КIанзавайди зегьметдин ветеран Рамазана (заз ам хъсандиз чида, ам кар алакьдай кас я) башламишай ва авунвай чIехи пай кIвалах, жумартлу рухваяр вилик экечIна, давамарун, кьилиз акъудун я. Герекзамай пулунин кьадар чирна, ам кIватIна кIанда. Нариман стхади лугьузвайвал, штулвийри, мукьвабуру, миресри, гаф садна, Кьурагьрин администрациядихъ галаз са меслятдал атана, кIвалах чкадилай юзурун буржи я. Ахпа чи виридан куьмекдалди кьилиз акъудин. ЦIи, Михаил Лезгинцеван юбилейдин йисуз кьванни, и кар кьилиз акъудайтIа, хъсан жедай. Зун пенсияда авай муаллим я. Са вацран пенсия за памятникдин фондуниз гуда. Ша, гьуьрметлубур, вирида гуьзлемишзавай памятник эцигунин мергьяматлу кIвалахда вирида иштиракин! Лезгинцевриз — гуьмбет! — эвер гузва за!
Райсудин Набиев
