4-майдиз Каспийск шегьердин аялрин “Кванториум” технопаркдин майдандал республикадин гьар жуьре мектебрай ва вузрай тир аялар ва муаллимар санал кIватIай мярекат кьиле фена. Ам технопаркдин иштиракчийри гьазурнавай ва гегьенш майданда раиж авуниз лайихлу проектриз талукьарнавай.
Мярекатда паталай атанвай са жерге мугьманрини иштиракна. Абурун арада технический илимрин кандидат, ДГТУ-дин транспортдин факультетдин декан Эдвард Батманов ва адан аспирантар авай. Абур атунин макьсад бажарагълу аялрин ва муаллимрин проектар ахтармишун, абурун тереф хуьн тир.
Мярекатдал чпин кьетIенвилелди ва инновациядин жигьетдай цIийивилелди гьейранарай гзаф кьадар итижлу проектрихъ галаз танишарна. Гьам муаллимри, гьамни мектебра кIелзавай аялри технический рекьяй чпин савадлувал, фикир авунин кьетIен жуьре раижна. Абуру кIвалахда алай аямдин эхиримжи технологияр ишлемишнавайди ва месэлаяр адетдинди тушир жуьреда гьялзавайди ачух хьана. Мярекатдин эхирдай мектебра кIелзавай аялар тербияламишунин кардик кьетIен пай кутаз алахъзавай ксар къейдна, “Кванториум” ДТ-дин ва мектебдин уьмуьрда активнидаказ иштиракзавай вирибуруз чухсагъул лагьана.
“И мярекат неинки проектар хуьдай, гьакIни гьар жуьре мектебрай ва вузрай тир аялривай ва муаллимривай чпин чирвилер ва тежриба пайиз жедай лап хъсан майдан хьана. Идалайни гъейри, ада чахъ бажарагълу, акьуллу, илим ва технология виликди тухуз, чи дуьнья мадни хъсанариз гьазур тир инсанар гзаф авайди тестикьарна”, — лугьузва мярекатдин тешкилатчи, “Кванториум” ДТ-дин директордин проектар идара авунин рекьяй заместитель, физикадинни математикадин илимрин кандидат, доцент Марат Гьуьсейнова.
Къейд ийин, Марат Керимхановича и мукьвара кьиле фейи “Точка роста”, “IT-куб” ва ДТ “Кванториум” центрайрин муаллимрин ахтармишунрин проектрин ва разработкайрин республикадин конкурсда сад лагьай чка кьуна. Адан тIебии ва илимдин хиле ахтармишунрин проект Дагъустан Республикада виридалайни хъсанди яз гьисабна.
РикIел хкин, аялрин “Кванториум” технопарк Каспийскдин 13-нумрадин мектебдин бинедаллаз алатай йисуз ачухнай. Ина 6 йисалай 18 йисал кьван яшда авай аялри физикадай, химиядай, биологиядай, робототехникадай ва IT-дай чирвилер къачузва. Абуруз тарсар профессорри, илимрин докторри ва доцентри гузва.
Технопарк виниз тир технологийралди гьазурнавай тадаракралди таъминарнава.
Амина Муслимова
