“Гьуьрметлу Наида Даировна! Сулейман-Стальский райондин Собранидин депутатрин, администрациядин тIварунихъай за Квез медицинадин илимрин докторвилин чIехи тIвар рикIин сидкьидай мубаракзава. Илимдин гзаф кьадар кIвалахрин автор, международный, Вирироссиядин илимрин гзаф конференцийрин, конгрессрин, форумрин иштиракчи яз, Куьне медицинадин илим вилик тухуник лайихлу пай кутазва, Шихнабиеврин хизандин баркаллу кар давамарзава. Чна Квел гьахълудаказ дамахзава. Квехъ, гьуьрметлу Наида Даировна, сагъламвал, хизандин бахтлувал, хъсан крар ва илимдин рекье цIийи агалкьунар хьана кIанзава.
Гьуьрметдивди, “Сулейман-Стальский район” МР-дин кьил Н. Абдулмуталибов”.
Медицинадин рекьяй зурба алим ва ам акъатай хизан неинки Дагъларин уьлкведа, гьакI Россиядин Федерацияда, адалай яргъарани гзафбуруз фадлай ва хъсандиз чида. Ери-бине Агъа СтIалрин хуьр тир Сулейманова (Шихнабиева) Наида Даировна алай вахтунда РД-дин здравоохраненидин министерстводин махсус центрадин гинекологиядин отделенидин заведующий, кьилин категориядин духтур, Дагъустандин медуниверситетдин акушервилин ва гинекологиядин кафедрадин доцент я.
Адахъ кьилин кьве образование ава: 2000-йисуз лап хъсан къиметралди Дагъустандин государственный медакадемия (“лечебное дело” пешекарвиляй), 2010-йисуз Дагъустандин государственный техуниверситет акьалтIарна.
2006-йисуз Ростовдин онкологиядин рекьяй илимринни ахтармишунрин институтда кандидатвилин ва 2016-йисуз Москвада медицинадин илимрин докторвилин диссертацияр хвена. Адахъ “Акушерство ва гинекология”, “Онкология”, “Ультразвуковая диагностика”… пешейрай сертификатар ава.
Н.Сулейманова 150-далай виниз илимдин кIвалахрин, гьабурукай яз 1 монографиядин, цIийи 3 теклифдин, са учебный пособидин, методикадин меслятрин автор, аспирантрин ва докторантрин илимдин регьбер я.
Алимди 2010-йисуз Гь.Махачеван тIварунихъ галай Фондунин Грант къачуна.
2016-йисуз адаз кьве сеферда РФ-дин здравоохраненидин министерстводин гьуьрметдин грамотаяр гана.
Н.Сулеймановади международный ва Вирироссиядин, регионрин уртах ва республикадин илимдин конференцийра, конгрессра, съездра, форумра иштиракзава. 2017-йисуз адаз Прагада (Чехия) кьиле фейи илимдинни тежрибадин конференцияда виридалайни хъсан докладчидин диплом гана.
Хазран Кьасумов
