И йикъара Мегьарамдхуьруьн райондин кьил Фарид Агьмедова райондин администрацияда жегьилрин крарин ва туризмдин рекьяй отделдин кIвалах веревирдна. Райондин сайтда хабар ганвайвал, совещанидал администрациядин жавабдар къуллугъчийри, тешкилатрин ва идарайрин кьиле авай ксари, къанун-къайда хуьдай органрин къуллугъчийри ва СМИ-дин векилри иштиракна.
“Жегьилрин крарин ва туризмдин рекьяй отдел” МКУ-дин директор Фарид Бейбутова жегьилриз руьгьдинни ахлакьдин тербия гунай ва и рекьяй кIвалах хъсанарунихъ элкъуьрнавай серенжемрикай райондин кьил Ф.Агьмедоваз хабар гана. Ам кьиле авай отделди райондин администрациядин культурадин, гьакIни физический культурадин ва спортдин отделрин, маса къурулушрин куьмекни галаз са жерге серенжемар кьиле тухванва. Абурун жергеда ава: рикIел хкунин вахта, спортдин акъажунар, викторинаяр, жуьрэтлувилин тарсар, тематикадин гуьруьшар. 2016-йисуз кьиле тухванвай серенжемрал гьалтайла, Мегьарамдхуьруьн районди республикадин амай районрин арада 3-чка кьуна. Алай йисузни и кIвалах зайифарнавач, волонтёрри руьгьдинни ахлакьдин тербиядихъ галаз алакъалу 30-дав агакьна мярекатар тешкилнава. Абурун жергеда “Гьан кван, гадаяр” военный ва спортдин къугъун, пневматикадин яракьдай лишанар кьунай акъажунар, “РикIел хуьнин шем” флеш-моб, “Крым ва Россия санал” викторина, “Михьи кьер” авай.
Вичин докладда Ф.Бейбутова мадни къейд авурвал, алай йисан эхирдалди и жигьетдай РФ-дин ва РД-дин Конституцийриз ва яржариз бахшнавай са жерге серенжемар кьиле тухунни пландик ква. Жаванризни жегьилриз руьгьдинни ахлакьдин тербия гунин кIвалах мадни хъсанарунин мураддалди районда волонтёррин гьерекат вилик тухудай центр ва военно-патриотический тербия гунай комиссия тешкилнава.
Отделди кьиле тухузвай кIвалах екеди ятIани, фикир гана кIанзавай крарни, кимивилерни амукьзавайди къейдна Фарид Бейбутова. ИкI, районда кьиле тухузвай мярекатра умуми образованидин идарайрин аялри иштиракзавайди, амма зегьметчи жегьилри саки чпин алакьунар къалур тийизвайди, военный ва ватанпересвилин рекьяй тербия гунин карда общественный тешкилатрин мумкинвилерикай зайифдаказ менфят къачузвайди лагьана.
Докладчидихъ яб акалайдалай кьулухъ Фарид Агьмедова отделдиз са жерге меслятарни теклифар гана. Кьилди къачуртIа, жегьилрин крарин ва туризмдин рекьяй отделдиз ва образованидин управленидиз гатун лагерра ватанпересвилин темайрай конкурсар тешкилун, яшар бегьем тахьанвай аялрин арада наркотикрин чIуру таъсирдин гъавурда тунихъ, сагълам уьмуьр пропаганда авунихъ элкъуьрнавай кIвалах давамарун, жаванриз ва жегьилриз руьгьдинни ахлакьдин тербия гунин кIвалахда агъсакъалрин, ветеранрин, яратмишунардай интеллигенциядин Советрин кIвалахдикай менфят къачун ва масабур.
Гуьгъуьнлай администрациядин къурулушдин хилерин начальникри, райондин са жерге тешкилатрин ва идарайрин векилри алатай гьафтеда кьиле тухванвай кIвалахрин гьахъ-гьисабар кьуна. Абурухъ яб акална Фарид Агьмедова руководителриз вилик эцигнавай везифаяр мадни чIехи нетижаяр аваз кьилиз акъудунихъ элкъуьрнавай са жерге буйругъар гана.
Гьазурайди — Рагнеда Рамалданова
