Ихьтин камаллу келимайрин сагьиб  Сажидин  Саидгьасанован  яшар 90-дав агакьнава! Машаллагь! Гьа вичи мукьвал-мукьвал тикрардайвал, “гьахъвал гвай, аршда авай Сада” адаз яргъалди ва рикIиз кIанивал уьмуьр тухудай мумкинвал гузва. Гьавиляй кас Аллагьдилайни, пачагьрилайни, вичин тереф хуьзвай дустарилайни, кIвал кадгъурзавай аялрин дидедилайни гзаф рази я.

Шииратдиз ам, критикада гьатнавайвал, ХХ асирдин 2-паюна атана. Вични “Вун накь вучиз атаначир?” шиирдалди машгьур хьана. Ли­­тературадин критик, машгьур шаир Ибрагьим Гьуьсейнова къейд­навайвал, и шиир халкьдин фольклордиз гзаф мукьва я. “И мукьвавал С.Саидгьасанован сатирадин саки вири шиирриз хас я”.

И къейд 1970-йисуз Даггизда чапдай акъатнавай  “Чешме” кIва­тIал­­­­дай къачунва. Ктабда а чIаван же­­гьил лезги 11 шаирдин эсерар гьат­­нава. Сажидин гьа къефледай я.

Адалай инихъ алатнавай девирда Сажидина вич неинки сатирадин, гьакI гражданвилин ва фило­софиядин тах квай шииррин, аялар патал кхьенвай махаринни пьесайрин, яшлубур патал кхьенвай “Ярагъ­ви ашукь Уьзден” тIвар алай тарихдин романдин ва гзаф маса эсеррин устад тирди субутна. И кар себеб яз, адаз Дагъустан Республикадин Кьил С.Меликован Указдалди “Дагъустандин Халкьдин шаир” лагьай чIехи гьуьрметдин тIварни ганва.

Сажидинакай чи газетда и мукьвара галай-галайвал кхьинар авунвайвиляй чна абур тикрар хъийизвач. Агакьнавай дережаяр тебрикзава:

90 йисан жегьил,

Зайифариз тахьуй гуьгьуьл.

Алагуьзлидин кьуна гъил,

МетIерал къвазиз, ая кьуьл!

Жагъизвач чаз маса тебрик,

Юбилейдиз я чун шерик.

Къуьрен шурва хьурай къалин,

Бул хъикьифар, фуни къуьлуьн.

Жув — тамада, паб — тIапIахъан,

Кьабулиз хьуй кIвале мугьман.

Геж хьайитIан Аци-Баци,

Гъурай ада ваз кьве бацIи.

НуькI халади хкурай цаз,

Буш къапара шараб хцаз.

КьацIайтIани къе ви рухвар,

Пака хъия ширин ахвар…

Къе, машаллагь, жемир гъафил.

Цеквре гъурай ваз чIехи фил!..

Алава:  С.С.Саидгьасанов 1933-йисан 2-майдиз СтIал Сулейманан ватанда — Агъа СтIалдал — дидедиз хьана. Ада юкьван мектеб, ДГУ-дин филфак акьалтIарна. Хайи хуьре ва  районда жуьреба-жуьре хилера зегьмет чIугуна.

Аялрин ва жегьилрин арада тербиядинни ахлакьдин кIвалах тешкилунай адаз “РД-дин лайихлу насигьатчи” ва “РД-дин культурадин ла­йихлу работник” лагьай тIва­рарни ганва. Шаир Агъа СтIал­дал яшамиш жезва. ЧIехи хизандин кьил я.

Мерд Али