Къе, 1-майдиз, Махачкъалада Дагъустандин Кьил Сергей Меликова зегьметдин рекье тафаватлу хьайи са жерге дагъустанвийрив государстводин шабагьар вахкана.

Къейд ийин хьи, мярекат Гатфарин ва Зегьметдин суварихъ галаз алакъалу яз тешкилнавай.

Республикадин кьили шабагьар вахкайбурун арада яшайишдин жуьреба-жуьре хилерин векилар – духтурар, муаллимар, артистар ва масабур авай.

Ахцегь райондин Чеперин хуьряй тир «Булах» КФХ-дин регьбер Темир Балагъаев «РД-дин хуьруьн майишатдин лайихлу къуллугъчи» тIварцIиз лайихлу хьана.

Т.Балагъаева хуьруьн майишатдин хиле зегьмет чIугваз 47 йис я. И йисара ада чубанвилелай гатIунна колхоздин председателдин къуллугъдал къведалди, жуьреба-жуьре кIвалахар тамамарна.

«Булах» КФХ 2000-йисуз арадал гъанва. 2016-йисалай адаз Т.Балагъаева регьбервал гузва.

Кьилин образование авай пешекарди (экономика ва бухгалтериядин гьахъ-гьисаб) къейдзавайвал, ада регьбервал гузвай майишатда гьам гъвечIи, гьамни чIехи карч алай гьайванар ава. Алай вахтунда абур Кочубейдин зонада ама. 16-майдилай кьулухъ гьайванар Ахцегь райондин дагълариз куьчар хъийидайвал я.

Лагьана кIанда, Т.Балагъаеван хцини баркаллувилелди вичин бубадин рехъ давамарзава. Саледин Балагъаев «Дагъви» СПК-дин чIехиди я.

«Лезги газет»