Малум тирвал, ЖКУ-дин гьакъи гудайла, бязи ксар патал чи уьлкведа кьезилвилер тайинарнава. Кьилди къачуртIа, кьезилвилер пуд дережадиз талукьарнава:
1) кьилдин ксариз талукьбур (зегьметдин ветеран, умуми начагъвилерин инвалид, Ватандин ЧIехи дяведин ветеран);
2) хизанриз талукьбур (аял-инвалид, женгинин гьерекатрин ветеран, гзаф аялар авай, эменни тIимил тир хизан);
3) кьетIен жуьредин кьезилвилер (медицинадин къуллугъчияр ва муаллимар).
ЖКУ-дин гьакъидиз талукь кьезилвилер туькIуьрун патал талукь ксар “Мои документы” идарайриз (МФЦ) агъадихъ къалурнавай документар гваз фин герек жеда:
— арзачидин паспорт;
— яшайишдин жигьетдай куьмек талукь жезва лагьана тестикьарзавай документ (медико-социальный справка, пенсиядин шагьадатнама);
— эгер кьезилвал хизандиз талукьди ятIа, хизандин гьакъиндай справка, делилар тестикьарзавай документарни галаз (паспортар, аялар хайивилин гьакъиндай шагьадатнамаяр, эвленмиш хьунин гьакъиндай шагьадатнама);
— кIвалин иеси я лагьана тестикьарзавай документ;
— эхиримжи вацра ЖКУ-дин гьакъи гайи квитанция;
— СНИЛС;
— банкунин реквизитар;
— зегьметдин книжка.
РД-дин МФЦ-дин кьилин идаради хабар гузвайвал, гзаф аялар авай, эменни тIимил тир хизанриз талукь кьезилвилер тайинардайла, эхиримжи пуд вацран къазанжидин кьадар къалурун чарасуз я.
«Лезги газет»
