24-апрелдиз Дербент райондин Агълабрин юкьван мектебда, милли «Образование» проектдин Вирироссиядин федеральный проектдик квай “Классные встречи” программадин сергьятра аваз, Дагъустандин шииратдин классик Етим Эминан ва мишгьур писатель, драматург, журналист Якьуб Яралиеван мукьва-кьилийрихъ галаз итижлу гуьруьш кьиле фена. Мярекат тешкилна кьиле тухвайди лезги чIаланни литературадин тарсар гузвай муаллим Рамина Сардарова тир.
Хуш гьалара кьиле фейи мярекатда Якьуб Яралиеван веледри — Мурад ва Гуьльнара Яралиеври, стхайри — Шабан ва Назир Яралиеври, вах Гуьльпери Рамазановнади, Етим Эминан штул Жамият Желиловади, Цилингрин хуьруьн тарих кIватIунал машгъул карчи Вадим Ханвердиева, и цIарарин авторди, мектебда кIелзавай аялри, муаллимри, хуьруьнвийри ва масабуру иштиракна.
Мярекатдин кьилин макьсад Цилингрин хуьр вилик тухуник чIехи пай кутур машгьур инсанрин тIварар раиж авун, абурун баркаллу зегьмет рикIелай ракъур тавун, акьалтзавай несилриз абурукай чирвилер гун тир.
Мектебдин директор Рейгьан Агъабеговади вичин рахунра Ватан кIан хьунин гьиссер сифте нубатда вичин кIвал, хизан, дидедин чIал, жуван хуьр кIан хьунилай гатIунзавайди къейдна. Уьлкведин халис гражданин, ватанперес хьун патал, ада къейд авурвал, чаз чи тарих, меденият, адетар ва чи Ватандин къенин югъ чир хьун лазим я.
Мярекатдал Рамина Сардаровади цилингвияр тир Етим Эминан, Цилинг БукIадин, Якьуб Яралиеван, муаллимвилин пеше къачур сад лагьай муаллим Хастан Абдужалиловадин, кьилин зоотехниквилин образование авай, ВДНХ-дин иштиракчи, “За освоение целинных земель” медалдин сагьиб Ифранса Загьировадин, партиядин работникар-муаллимар Хидир Демирован, Тагьирбег Тагьирован, Эмирхан Селимханован, Шабан Яралиеван ва масабурун тIварар кьуна.
Гуьруьшда иштиракай аялри чпиз мярекатдин игитрикай хъсан чирвилер авайди къалурна. Абуру Етим Эминан ва Якьуб Яралиеван уьмуьрдикай ва яратмишунрикай маналу суьгьбетна, шиирар ва прозадин эсеррай чIукар кIелна.
Мярекатдал рахай Мурад, Гуьльнара, Шабан ва Назир Яралиеври, гьикаятчидин вах Гуьльпери Рамазановнади Якьуб Яралиеван яратмишунрикай ва уьмуьрдикай чпин рикIел аламай малуматар гана, уьмуьрда хьайи бязи крар рикIел хкана.
Эхирдай школадин директорди кIватI хьанвайбур Агълабрин юкьван мектебдиз Якьуб Яралиеван тIвар гунин гьакъиндай педсоветди кьабулнавай къарардихъ галаз танишарна.
Къагьриман Ибрагьимов
