Гьукуматдин къайдаяр дегиш хьайидалай кьулухъ демократияди йигиндиз камар къачуз башламишна. Идахъ галаз алакъалу яз, муаллимвилин пешедиз фикир гудайбурни тIимил хьана. Мектебар куьтягьай, чпихъ далу, пулар авай аялар хийир къведай чкайра кIелиз физва.
Муаллимвилин пеше “престижни туш” лугьуз, и рекьиз ахьтин фикир гузвач. Муаллимвал им акьалтзавай жегьил несилдиз чирвал, акьул, обществода тухудай къайда, культура чирдай рекьерикай сад я.
Жуван хизанда авай 2-3 аялдиз дуьз тербия гуз, абур вердишариз жезвач. Муаллимди классда авай гьар жуьредин 15-20 аялдиз кIелиз-кхьиз чирзава, гьар са аялдихъ галаз рахадай къайда жагъурзава, дуьз рекьер къалурзава. Ихьтин муаллимри коллективдин, диде-бубайрин арада гьуьрметни къазанмишзава. СтIал Сулейманан райондин Герейханован 1-хуьруьн Р.Османован тIварунихъ галай школадин лезги чIаланни литературадин муаллим Балиева Нарима Зумрудиновна гьа ихьтинбурукай сад я. Балиеврин хизан Герейханован хуьре тIвар-ван авай, халкьдин арада гьуьрмет къазанмишзавай, хуьре кьиле физвай жемятдин вири кIвалахра иштиракзавайбурукай я. Наримади гележегдин пеше яз муаллимвал хкяна. Адан диде Ражифата лугьузвайвал, Наримадиз гъвечIи чIавалай аялар кIандай.
Нарима 1979-йисан 17-ноябрдиз дидедиз хьана. 8-класс хъсан къиметралди акьалтIарай ам 2000-йисуз Дербентдин педколледждик экечIна. Хуьруьз хтай жегьил пешекар гьа вичи кIелай школада гъвечIи классрин муаллим яз кIвалахал акъвазна. Ада са шумуд йисуз классдин регьбервал авуна. Ада вич аялрихъ рикI кузвай халисан муаллим тирди къалурна. Дагъустандин илимдинни ахтармишунардай институтда акъудзавай кIватIалра са шумудра Наримадин докладар чапна.
2018-йисуз республикада кьиле фейи конкурсра Наримади 2-чка кьуна. Райондин образованидин управленидин начальник Гь.Шихбабаева адаз грамотаяр, районда кардик квай “Умуд” фондунин патай пулдин премия гана.
Районда кьиле физвай конкурсра, олимпиадайра Наримади иштиракзава, пишкешдин чкаяр кьазва. Ада тербия гузвай аялрини хъсан нетижаяр къазанмишзава, уьлкведин вузра чирвилер къачузва. Школада Нарима Зумрудиновна кIвенкIвечи муаллимрикай сад я. Тарсарилай гуьгъуьниз, галат тахьана, ада аялрин диде-бубайрихъ галаз сих алакъаяр тайинарзава, зайиф аялрихъ галаз кьилди тарсар тухузва.
2023-йисуз районда кьиле фейи “Лезги чIалан виридалайни хъсан муаллим” конкурсда ада 2 лагьай сеферда иштиракна ва 3-чкадиз лайихлу хьана.
Нарима Зумрудиновнади школада кIвалахиз 23 йис хьанва. Ам кьилин категориядин муаллим я. Ада кьве велед тербияламишзава. Гада Ламета 6-классда, руш Мадинади 5-классда хъсан къиметар аваз кIелзава. Абурун фикирарни гележегда дидедин пеше хкягъун я.
Гьуьрметлу Нарима Зумрудиновна, квехъ мадни агалкьунар, муаллимвилин дережа хкаж хьун чи мурад я.
Вадим Жамалдинов
